एजेन्सी – बार्सिलोना प्रशिक्षक किके सेटिनलाई फ्रान्सेली फरवार्ड एन्टोइन ग्रिजमनका पारिवारिक सदस्यले सामाजिक संजालमार्फत नै उनीप्रति गरेको व्यवहारलाई लिएर आक्रोश पोखेका छन् ।

पछिल्लो समय निकै कठिन परिस्थितिबाट गुज्रिरहेका ग्रिजमनले मंगलबार आफ्नो पूर्व क्लब एटलेटिको म्याड्रिडविरुद्ध अर्को समस्याबाट गुज्रनुपर्यो । खेलको ८९ औं मिनेटमा मैदान प्रवेश गरेका ग्रिजमनले आफ्नो टोलीले २-२ को बराबरीमा रोकिएको अवस्थामा खेलमा कुनै प्रभाव छोड्ने मौका नै पाएनन् ।

सेटिनले ग्रिजमनलाई पछिल्लो तीनमध्ये चार खेलमा बेन्चमा राख्दा निकै आलोचना हुँदै आएको छ । दोस्रो हाफको पूरा समय नै ग्रिजमन वार्मअप गरिरहेका थिए । आफ्नो पूर्व क्लब विरुद्ध घरेलु मैदानमा खेल्न नपाउँदा ग्रिजमनको मनोबल गिर्नु स्वभाविक हो । तर यस अवस्थाबारे उनी मौन रहेपनि उनको परिवारले भने सामाजिक संजालमार्फत आक्रोश पोखेका छन् ।

खेलपछि प्रशिक्षक सेटिनले दिएको अभिव्यक्तिले परिवारलाई झनै चिढाएको थियो । सेटिनले ग्रिजमनलाई नाखेलाउनुको कारण सार्वजनिक रुपमा बताउन चाहेनन् । उनले आफू खेलाडीसँग व्यक्तिगत रुपमा छलफल गर्ने र माफी माग्नुपर्ने अवस्था भने नरहेको बताएका थिए ।

सेटिनले यसो भनिरहँदा ग्रिजमनका पिता अलेन भने चुप रहेका छैनन् । पिता अलेनले सेटिनको यस अभिव्यक्तिलाई स्क्रिनसट लिँदै आफ्नो इन्स्टाग्राममा पोस्ट गरेका छन् । उनले लेखेका छन्, ‘खुलेर बोल्नका लागि तिमिसँग ट्रकको चाबी हुनुपर्छ । तर तिमि उक्त ट्रकको एक यात्रु मात्र हौ ।’

ग्रिजमनका भाइ थिओ ग्रिजमनले पनि सामाजिक संजालमार्फत आफ्नो दाजुले खेल्न नपाएकोमा दुख पोखेका छन् । उनले ग्रिजमनले आफ्नो पूर्व क्लबविरुद्ध अन्तिम समयमा मात्र मैदान छिरेको पक्षलाई ट्वीटमा लेखेका छन् ।

‘दुई मिनेट… मलाई साँच्चै रुन मन लागेको छ,’ थिओले लेखेका छन् ।

सेटिनको यसअघि ब्राजिलियन मिडफिल्डर आर्थर मेलोको आमासँग पनि यस्तै समस्या रहेको थियो । सेटिनले सार्वजनिक रुपमा नै आर्थरले खेल्न नसकेको बताएपछि उनको आमाले सेटिनको आलोचना गरेकी थिइन् ।