एजेन्सी – पोर्चुगिज मिडफिल्डर ब्रुनो फर्नान्डेस लामो समयदेखि म्यानचेस्टर युनाइटेडको नजरमा थिए । तर पछिल्ला ट्रान्सफर विन्डोमा दुई क्लबबीच सहमति बन्न नसक्दा उनको प्रिमियर लिग यात्रा सफल हुन सकेन ।

यसपटक भने सिजनको बीचमा रहेको जनवरी ट्रान्सफर विन्डो नै भएपनि युनाइटेडले पछि नहट्ने निर्णय गर्यो । स्पोर्टिङ लिस्बनको मागअनुसार नै ट्रान्सफर रकम तिर्दै अन्तत: ब्रुनो युनाइटेड आए । प्रशिक्षक ओले गनर सोल्सायरको नेतृत्वमा टोलीले अपेक्षित प्रदर्शन गर्न सकेको थिएन । मिडफिल्डर पल पोग्बाको चोट र सम्बन्धमा आएको चिसोपनले प्रत्यक्ष असर गरेको देखिन्थ्यो ।

ब्रुनो आउनुअघि युनाइटेडले खेलेका पछिल्ला ८ खेलमा नतिजा बिर्सनलायक थियो । युनाइटेडले ४ खेलमा पराजय बेहोर्दा ३ खेलमा जित र एक खेल बराबरीमा सकिएको थियो । यसक्रममा ११ गोल गरेको युनाइटेडले १० गोल खाएको थियो । मिडफिल्डमा ब्रुनो आएपछि भने टोलीको प्रदर्शन त सुध्रिएको छ नै, त्यसले नतिजामा पनि प्रत्यक्ष प्रभाव छोडेको छ ।

मिडफिल्डको मध्यभागमा खेल्ने ब्रुनोले आक्रमणमा बेग्लै शक्ति थपेका छन् । रक्षात्मक रणनीतिमा पनि उनको उपस्थिति देखिन्छ । उनले बल पोसेसनसँगै फरवार्डहरुलाई प्रयोग गर्ने क्षमता राख्दछन् । ब्रुनो आएयता युनाइटेडले खेलका ८ खेलमा अपराजित रहेको छ । टोलीले ५ खेलमा जित हासिल गर्दा ३ खेल बराबरीमा सकिएको छ ।

युनाइटेडले यसक्रममा १५ गोल गर्दा मात्र २ गोल खाएको छ । ब्रुनो आफैंले पनि ५ गोल गर्दै ३ असिस्ट प्रदान गरेका छन् । मतलब युनाइटेडले यस समयमा गरेको आधा भन्दा बढी गोलमा उनको प्रत्यक्ष संलग्नता रहेको छ । प्रिमियर लिगमा यस समयमा उनीभन्दा बढी गोलमा संलग्न अरु खेलाडी छैनन् ।

प्रिमियर लिगमा आउने बितिकै ब्रुनोले छोडेको प्रभाव प्रशंसनीय छ । सामान्यतया अन्य लिगको तुलनामा प्रिमियर लिग कठिन मानिने गर्छ । प्रतिद्वन्द्वीको स्तरमात्र नभएर यसले माग गर्ने शक्ति जो कोहिले सुरुवातमै मिलाउन सक्दैन । तर ब्रुनोको प्रदर्शन हेर्दा उनले लामो समयदेखि यसै लिगमा खेलेझैं लाग्छ ।

ब्रुनो विपक्षी डिफेन्सका लागि निरन्तर समस्या दिइरहन सक्ने खेलाडी हुन् । उनले औसतमा प्रति खेल ३.८ सट प्रहार गरेका छन् । उनले हरेक खेलमा औसतमा २ मुख्य पास दिन्छन् । उनको खेल्ने शैली अनुसार ७५ प्रतिशत पास सफलता पनि निकै राम्रो मानिन्छ ।

ब्रुनो खेलमा जोखिम लिन माहिर खेलाडी हुन् । सधैं बलकै वरपर रमाउने उनी सकेसम्म चाडो बल अगाडी बढाउन खोज्छन् । उनी सामान्यतया छोटो र सहज पास खेल्न चाहदैनन् । उनको खुट्टामा बल परेपछि केहि फरक हुन्छ भन्ने अपेक्षा हुन्छ र उनले कमै मात्र निराश तुल्याउँछन् ।

ब्रुनोको आगमनले टोलीका अन्य खेलाडीलाई पनि प्रत्यक्ष प्रभाव परेको छ । फरवार्ड एन्थोनी मार्सियल युनाइटेड करिअरकै उच्च विन्दुमा पुगेका छन् । उनले पछिल्ला ७ खेलमा ६ गोल गर्दै आफूलाई उच्च स्तरमा खेल्न सक्ने प्रमाणित गरेका छन् । पोग्बाको आगमनले मिडफिल्ड थप बलियो भएको छ ।

ब्रुनो आएको धेरै भएको छैन । तर उनले युनाइटेडका समर्थकलाई नयाँ आशा दिलाएका छन् । जति धेरै उनी लिगमा भिज्दै जान्छन्, उनले अझ सहज रुपमा आफूलाई प्रस्तुत गर्ने सक्नेछन् । सर एलेक्स फर्गुसनले क्लब छाडेपछि पहिलो पटक युनाइटेडमा केहि हुन्छ भन्ने आशा पलाएको छ । यसमा मुख्य भूमिका विश्व स्तरीय ब्रुनोकै रहेको छ र रहनेछ ।