एजेन्सी – स्पेनिस ला लिगामा आज राति ३३औं चरणका तीन खेलहरु हुँदैछ । शीर्षस्थानमा रहेको रियल म्याड्रिडले यो सिजन राम्रो खेल पस्किरहेको गेटाफेसँग प्रतिस्पर्धा गर्दा एइबारले ओसासुना तथा रियल सोसिडाडले एस्पान्योलको सामना गर्दैछ ।

रियलले घरेलु मैदान स्टेडियो अल्फ्रेडो डि स्टेफानोमा आज राति १ः४५ बजे गेटाफेसँग प्रतिस्पर्धा गर्दैछ । रियलले यो खेलमा जित हात पारे स्पष्ट चार अंकको अग्रता कायम गर्दै उपाधि दावेदारितालाई थप बलियो बनाउने छ ।

त्यसैले रियल गेटाफेविरुद्ध जितकै लागि मैदान उत्रनेछ । हारले १ अंकको तथा बराबरीले दुई अंकको अग्रता कायम राख्नेछ । कोरोनापछिको सबै पाँच खेलमा जित हात पारेको रियल सोही प्रदर्शनलाई निरन्तरता दिने दाउमा हुनेछ ।

गेटाफेविरुद्धबेल्जियन फरवार्ड इडेन हजार्ड नभएपनि करिम बेन्जेमा, भिनिसियस जुनियर, मार्काे एसेन्सियो, रोड्रिगो, ग्यारेथ बेल, टोनी क्रुस, लुका मोड्रिच, क्यासमिरो, फेडरिको भाल्भेर्डे, इस्को, कप्तान सर्जियो रामोस, मार्सेलो, फरल्यान्ड मेन्डी र गोलरक्षक थिवाउट कोर्टुवाको साथ रहनेछ ।

यता, यो सिजन उच्च प्रदर्शन गरिरहेको गेटाफे रियललाई स्तब्ध पार्दै शीर्ष चारको सम्भावनालाई जीवितै बनाउने दाउमा हुनेछ । छैटौं स्थानमा रहेको गेटाफेले रियललाई पराजित गर्न सके चौथो स्थानको सेभियासँगको अंक दुरी २ मा छोट्याउदै शीर्ष चारको सम्भावनालाई जीवितै राख्ने छ । बराबरी या हारले छैटौं स्थानमा नै रहनेछ ।

बिहीबार राति नै एइबार र ओसासुनाबीचको खेल राति ११ः१५ बजे तथा रियल सोसिडाड र एस्पान्योलबीचको खेल पनि राति ११ः१५ बजे नै हुनेछ ।