एजेन्सी – म्यानचेस्टर सिटीले यो सिजनको प्रिमियर लिग च्याम्पियन बनिसकेको मर्सिसाइड क्लब लिभरपुलको आतिथ्यता गर्दैछ । खेल इतिहाद स्टेडियममा नेपाली समय अनुसार राति १ बजेपछि हुनेछ ।

खेल सुरु हुनुअघि सिटीले च्याम्पियन बनिसकेको लिभरपुललाई सम्मानस्वरुप ‘गार्ड अफ अनर’ दिनेछ । लिभरपुलले यो सिजनको प्रिमियर लिगको उपाधि जितिसकेको र सिटीको पनि दोस्रो स्थान लगभग पक्का भइसकेका कारण यो खेल दुवै टोलीका लागि स्थान निर्धारणका हिसाबले महत्त्वपूर्ण नभएपनि प्रतिष्ठाको भिडन्त हुनेछ ।

लिभरपुलललाई बढी अंक जोड्दै प्रिमियर लिगको च्याम्पियन बन्ने कीर्तिमान बनाउन अवसर रहेका कारण लिभरपुल सिटीलाई उसकै मैदानमा पराजित गर्ने लक्ष्यमा मैदानमा उत्रनेछ । प्रिमियर लिगको बाँकी ७ खेलको २१ मध्ये १४ अंक जोडे लिभरपुलले सिटीको १०० अंकको कीर्तिमानलाई बराबरी गर्नेछ ।

सोही कारण लिभरपुल बाँकी खेलमा अंक नगुमाउने रणनीतिमा हुनेछ । यसका लागि लिभरपुलका मोहम्मद सलाह, साडियो माने, रोबर्टाे फिर्मिन्हो, कप्तान जोर्डन हेन्डरसन, जर्जिन्हो विज्नल्डम, भर्जिल भान डाइक र गोलरक्षक एलिसन बेकरको साथ रहनेछ ।

यता, घरेलु मैदानमा सिटी लिभरपुललाई पराजित गर्ने लक्ष्यसहित मैदान उत्रनेछ । र अंक दुरी पनि छोट्याउने दाउमा हुनेछ । रहिम स्ट्रलिङ, ग्याब्रियल जेसस, केभिन डि ब्रुयन, बर्नाडो सिल्भा, सर्जियो अगुइरो जस्ता खेलाडीले कुनैपनि बेला खेललाई आफ्नो पक्षमा पार्न सक्ने क्षमता राख्दछन् ।

प्रिमियर लिगको ३२औं चरणको खेल जारी रहँदा लिभरपुलले सिटीलाई २३ अंकले पछि पारेको छ । लिभरपुलको ३१ खेलबाट ८६ अंक रहेको छ । समान खेलबाटै सिटीको ६३ अंक रहेको छ ।

यस्तै बिहीबार राति नै सेफिल्ड युनाइटेड र टोटेनहम हस्टपरबीच राति १०ः४५ बजे प्रतिस्पर्धा हुदैछ । आठौं स्थानमा रहेको टोटेनहमलाई सातौं  स्थानमा उक्लने अवसर छ भने सेफिल्डलाई पनि सातौं स्थानमा नै उक्लने अवसर छ । च्याम्पियन्स लिगमा स्थान बनाउने हिसाबले यी दुई टोलीबीचको खेल निकै रोमाञ्चक र प्रतिस्पर्धात्मक हुने अनुमान गरिएको छ ।