एजेन्सी – इटालियन क्लब इन्टर मिलानले रियल म्याड्रिडबाट डिफेन्डर अक्रफ हाकिमीलाई खरिद गरेको छ ।

गत सिजन रियलबाट लोनमा बोरुसिया डर्टमुन्ड पुगेका हाकिमी रियलको योजनामा नपरेपछि विक्री गर्ने निर्णय भएको थियो । इन्टरले रियलले माग गरेको ४० मिलियन युरो तिर्ने सहमति जनाएपछि हाकिमी इन्टर मिलानमा अनुबन्धित भएका हुन् । उनले क्लबसँग ५ वर्षको सम्झौता गरिसकेका छन् ।

रियलले हाकिमीलाई बेचेपनि सम्झौतामा विशेष प्रावधान राखेको छ । यस प्रावधान अनुसार रियलले चाहेको खण्डमा हाकिमीलाई पुन: तोकिएको मूल्यमा फिर्ता किन्न सक्नेछ । सन् २००६ देखि नै रियलको एकेडेमीमा रहेका उनलाई जिदानले आफ्नो योजनाम नरहेको बताएपछि क्लबले विक्री गर्ने निर्णय लिएको थियो ।

हाकिमीले लगातार दुई सिजन डर्टमुन्डमा उत्कृष्ट प्रदर्शन गरेका थिए । रक्षात्मक रुपमा मात्र नभएर आक्रमणमा पनि उनले प्रभाव जमाएका थिए । डर्टमुन्डले उनलाई स्थायी रुपमा राख्ने प्रयास गरेपनि रियलको माग पूरा गर्न नसक्दा सम्झौता गर्न सकेन । डर्टमुन्डले पीएसजीबाट फ्री एजेन्टका रुपमा बेल्जियन डिफेन्डर थोमस म्युनिएरलाई अनुबन्ध गरिसकेको छ ।

मोरक्कोको राष्ट्रिय टोलीका लागि खेल्दै हाकिमीले २८ क्याप जितेका छन् । उनले राष्ट्रिय टोलीका लागि पनि २ गोल गरेका छन् । इन्टरमा उनले आफ्नो रोजाईको राइट विंगब्याक पोजिसनमा नै खेल्नेछन् । रियलमा दोस्रो रोजाईको राइट ब्याकका रुपमा बस्न नमान्दा पनि उनी इन्टर प्रस्थान गरेका हुन् ।