एजेन्सी – म्यानचेस्टर सिटीले यो सिजनको इंग्लिस प्रिमियर लिगको च्याम्पियन बनिसकेको लिभरपुलमाथि सानदार जित निकालेको छ । घरेलु टोली म्यानचेस्टर सिटीले लिभरपुललमाथि ४–० को सानदार जित हात पारेको हो । 

इतिहाद स्टेडियममा बिहीबार राति भएको खेलमा सिटीको सानदार जितमा केभिन डि ब्रुयन, रहिम स्ट्रलिङ र फिल फोडेनले गोल गर्दा एक गोल उपहार पाएको थियो । बल पोसेसनमा पकड जमाएपनि लिभरपुलले गोल गर्न सकेन ।

यो सिजन प्रिमियर लिगमा लिभरपुलको दोस्रो हार हो । यसअघि लिभरपुल फेब्रुअरीमा वाट्फोर्डसँग ३–० ले पराजित भएको थियो । लिभरपुलले ३२ मध्ये २८ खेलमा जित तथा समान २ बराबरी र २ हारको नतिजा निकालेको छ ।

प्रतिस्पर्धात्मक खेलको पाँचौ मिनेटमा लिभरपुलले खेलमा अग्रता लिने अवसर खेर फालेको थियो । लिभरपुलका मोहम्मद सलाहको प्रहारलाई सिटीका गोलरक्षक इडर्सन मोरेसले बचाएका थिए । दोस्रो प्रयासमा साडियो माने पनि चुकेका थिए । त्यसअघि २१औं मिनेटमा साडियो मानेको प्रहार पोस्टमा लागेर फर्किएको थियो ।

२५औं मिनेटमा घरेलु टोली सिटीले केभिन डि ब्रुयनको पेनाल्टी गोलमार्फत खेलमा अग्रता बनाएको थियो । जोसेप गोमेजले स्ट्रलिङलाई पेनाल्टी बक्समा तानेपछि रेफ्रीले सिटीलाई पेनाल्टी प्रदान गरेको थियो । ३०औं मिनेटमा केभिन डि ब्रुयनको पासमा ग्याब्रियल जेसस चुक्दा सिटीले अग्रता दोब्बर बनाउने अवसर गुमायो ।

३५औं मिनेटमा रहिम स्ट्रलिङले गोल गर्दै सिटीको अग्रता दोब्बर पारे । फिल फोडेनको पासमा रहिमले जोसेप गोमेज र गोलरक्षक इलिसन बेकरलाई बिट गर्दै गोल गर्न सफल भएका थिए । ४५औं मिनेटमा ब्रुयनको पासमा फिल फोडेनले गोल गरेपछि सिटीले पहिलो हाफमा ३–० को आरामदायी अग्रता बनाउन सफल भयो ।

दोस्रो हाफको शुरुमै सिटीले गोलका तीन अवसर खेर फाल्यो । ५०औं मिनेटमा लिभरपुलका एलेक्सन्डर अर्नाेल्डको थ्रु पासलाई सिटीका जेससले नियन्त्रणमा लिदै गरेको प्रहारलाई एलिसनले बचाएका थिए । ५१औं मिनेटमा रहिम स्ट्रलिङको २५ यार्डबाट गरेको प्रहार डिफेन्डर फाविन्होलाई डिफ्लेक्सन हुदै पोस्टबाट थोरै बाहिरिएको थियो । लगत्तै केभिन डि ब्रुयनको प्रहारलाई भर्जिल भान डाइकले गोललाइनबाट क्लियर गर्दै गोल टारेका थिए ।

६६औं मिनेटमा अक्सलेड चेम्वरलेनले आफ्नै पोस्टमा गोल गरेपछि सिटीले खेलमा ४–० को फराकिलो अग्रता बनायो । रियाद महारजेजको काउन्टर अट्याकमा रोड्रि हुदै केभिन डि ब्रुयनबाट स्ट्रलिङले गरेको प्रहारलाई बचाउन खोज्दा चेम्वरलेनले आफ्नै पोस्टमा गोल गर्न पुगेका थिए । इन्ज्युरी समयको थप गरिएको चौथो मिनेटमा रियाद महारजेले गोल गरेपछि भिएआरको मान्यता पाएन । महारेजले गोल गर्नुअघि बल फिल फोडेनको हातमा लागेको भिएआरमा देखिएको थियो ।

लिभरपुलले भने कुनै पनि समय सिटीको पोस्टमा गतिलो आक्रमण बुन्न नसक्दा ४–० को हार भोग्न पुग्यो । लिभरपुलमाथिको जितसँगै सिटीले अंक दुरी २० मा झारेको छ । सिटीको ३२ खेलबाट ६६ अंक पुगेको छ । लिभरपुलको समान खेलबाटै ८६ अंक छ ।