एजेन्सी – इटालियन सिरी ‘ए’ मा एटलान्टाले नेपोलीलाई पराजित गरेको छ । घरेलु मैदानमा एटलान्टाले नेपोलीमाथि २–० को सहज जित निकालेको हो ।

एटलान्टाको जितमा मारियो पासालिक र रोविन गोसेन्सले गोल गरे । दुवै गोल दोस्रो हाफमा सम्भव भएको थियो । बरगामोमा बिहीबार राति भएको प्रतिस्पर्धात्मक खेलको पहिलो हाफ गोलरहित बराबरीमा सकिएको थियो ।

दोस्रो हाफको सुरुवातमै घरेलु टोलीले खेलमा अग्रता लिन सफल भएको थियो । ४७औं मिनेटमा एलेजान्द्रो गोमेजको क्रसमा पासालिकले हेडमार्फत गोल गर्न सफल भएका थिए । ५४औं मिनेटमा राफायल टोलोइको पासमा रोविन गोसेन्सले गोल गर्दै एटलान्टाको अग्रता दोब्बर बनायो ।

त्यसपछि थप गोल निस्कन नसक्दा एटलान्टा २–० ले विजयी हुन सफल भयो । जितसँगै एटलान्टाले अर्काे सिजनको च्याम्पियन्स लिगमा छनोट हुने सम्भावना बलियो बनाएको छ । चौथो स्थानमा रहेको एटलान्टाको २९ खेलबाट ६० अंक पुगेको छ । जुन पाँचौ स्थानको रोमाको भन्दा १२ अंकले बढी हो । पराजित नेपोली ४५ अंक छैटौं स्थानमा यथावत रहेको छ ।

यस्तै अर्काे खेलमा १० खेलाडीमा समेटिएको रोमा घरेलु मैदानमा उडिनेसीसँग २–० ले स्तब्ध बनेको छ । रोमालाई स्तब्ध बनाउन उडिनेसीका केभिन लासाग्ना र लिजा नेस्टोरोभ्स्कीले गोल गरे ।

१२औं मिनेटमा केभिन लासाग्नाको गोलबाट उडिनेसीले खेलमा अग्रता बनाएको थियो । ३०औं मिनेटमा रोमा १० खेलाडीमा समेटिएको थियो । डिएगो पेरोटी सिधै रातो कार्ड खादै मैदानबाट बाहिरिएपछि रोमाले ६० मिनेट १० खेलाडीमा खेल्नुपरेको थियो । ७८औं मिनेटमा लिजा नेस्टोरोभ्स्कीले गोल गर्दै उडिनेसीलाई २–० को जित दिलाए ।

जितसँगै उडिनेसी ३१ अंक जोडेर १४औं स्थानमा उक्लन सफल हुदा रोमा ४८ अंक जोडेर पाँचौं स्थानमा यथावत रहेको छ ।