एजेन्सी – इंग्लिस क्लब म्यानचेस्टर सिटीका जर्मन विंगर लेरोय साने सिजनको अन्त्यसँगै जर्मन च्याम्पियन बायर्न म्युनिखमा अनुबन्धित हुने भएका छन् ।

बायर्नले सिटीसँग ५५ मिलियन पाउन्डको सम्झौता गर्दै जर्मन राष्ट्रिय टोलीका विंगरलाई म्युनिखमा अनुबन्धित गर्न सफल भएको हो । २४ वर्षीय सानेले बायर्नमा ५ वर्षका लागि सम्झौता गरेका हुन् । बायर्नले साने क्लबमा अनुबन्धित भएको पुष्टि गरेको छ । सानेले बायर्नको अफिसियलसँग रहेर क्लबको जर्सी सार्वजनिक गरेको र सम्झौता पत्रमा हस्ताक्षर गर्दै गरेको तस्वीर सार्वजनिक गरेको छ ।

बायर्नले सुरुवातमा ४५ मिलियन तिर्ने र सानेको प्रदर्शन र अन्य बोनससमेत सिटीले ५५ मिलियनसम्म पाउन सक्नेछ । यदि बायर्नले सानेलाई अन्य क्लबमा बेचेको खण्डमा सिटीले त्यसको १० प्रतिशत रकम प्राप्त गर्नेछ । सिटीमा अनुबन्धित भएसँगै सानेले बायर्नको अफिसियल वेवसाइटमा बायर्न ठुलो क्लब र क्लबको पनि ठुलो योजना रहेका कारण नयाँ क्लबमा नयाँ चुनौतीको सामना गर्न तयार रहेको बताएका छन् ।

‘मलाई थाहा छ । हान्सी फ्लिक जर्मनीको यु–२१ टोलीको प्रशिक्षक रहँदा मैले उनलाई राम्ररी चिन्दछु । हाम्रो सम्वन्ध निकै राम्रो रहेको छ । त्यसैले पनि म बायर्न आएको हु । म यहाँबाट धेरै भन्दा धेरै ट्रफी जित्न चहान्छु,’ सानेले भने, ‘विशेष गरी च्याम्पियन्स लिग मुख्य प्राथमिकतामा रहनेछ ।’

यस्तै सानेले म्यानचेस्टर सिटी र सिटीका फ्यानलाई धन्यवाद ज्ञापन गरेका छन् । ‘सबैलाई विशेष धन्यवाद । सिटीमा चार वर्ष बिताउदाको क्षण निकै रोमाञ्चक र सफलतामा रह्यो । हामीले चार वर्षमा धेरै खेल खेल्यौ । गोल पनि गर्‍यौं । हामीले केही कीर्तिमानहरु पनि बनायौं र सँगै विभिन्न ७ उपाधि जित्न सफल भयौं ।’

सानेले सिटीको सम्झौता नविकरण प्रस्ताव अस्विकार गरेपछि उनको भविष्य अन्यत्र रहेको प्रष्ट भएको थियो । सन् २०२१ सम्म सम्झौता रहेकाले सिटीले उनलाई बेच्नु उचित रहेको निर्णय गरेको हो ।

साने सन् २०१६ मा जर्मन क्लब साल्केबाट ३७ मिलियन पाउन्डमा सिटी आएका थिए । उनकै उच्च प्रदर्शनमा सिटीले पछिल्लो दुई सिजन प्रिमियर लिग उपाधि जितेको थियो । यस सिजन भने चोटका कारण उनले प्रिमियर लिगमा खेल्न पाएनन् । उनले कोरोनापछि पुनरागमन गर्दै पूर्ण फिटनेसमा फर्कने तयारी गर्दैछन् ।