एजेन्सी – क्याटलान क्लब बार्सिलोनाले कोरोना भाइरस कोभिड –१९ पछिका खेलमा उत्कृष्ट खेल पस्कन सकेको छैन । कोरोनाअघि स्पेनिस ला लिगामा २ अंकको अग्रता लिएको बार्सिलोना अहिले शीर्षस्थानको रियल म्याड्रिडसँग ४ अंकले पछि परिसकेको छ ।

यस्तो अवस्थामा बार्सिलोनाले क्लबका प्रशिक्षक क्विके सेटिनलाई बर्खास्त गर्दै नयाँ प्रशिक्षक ल्याउने तयारी गरिरहेको छ । कोरोनापछिको ६ खेलमा बार्सिलोनाले ६ अंक गुमाइसकेको छ । उपाधि यात्रा पनि निकै कमजोर बन्दै गएको अवस्थामा उपाधिको आशालाई जीवितै राख्न बार्सिलोनाले यो सिजनको केही खेल बाँकी रहेको अवस्थामा पनि नयाँ प्रशिक्षक नियुक्त गर्न सक्नेछ ।

कोरोनापछिको पछिल्ला ६ खेलमा अपराजित रहेपनि बार्सिलोनाले सेभिल्ला, सेल्टा डि भिगो र एट्लेटिको मड्रिडसँग अंक गुमाएको थियो । विशेषगरी सेल्टा डि भिगोसँगको खेलमा अंक गुमाएपछि बार्सिलोनाको मैदान बाहिर र भित्रको विवाद छताछुल्ल भएको थियो ।

त्यसैले पनि बार्सिलोनाले प्रशिक्षक सेटिनलाई बर्खास्त गर्दै नयाँ प्रशिक्षक नियुक्त गर्ने सम्भावना रहेको छ । बार्सिलोनाको प्रशिक्षकको लागि सम्भावित १० जनाको सुची तयार पारिएको छ । यसमा बार्सिलोनाकै पूर्व खेलाडी जाभी हर्नान्डेजको नाम अग्रस्थानमा रहेको छ । बार्सिलोनाले यसअघि नै उनलाई ल्याउने प्रयास गरेपनि जाभी आफैंले तयार नभएको भन्दै नजाने निर्णय गरेका थिए ।

यसबाहेक प्रशिक्षक मार्सेलो गलार्डो, जेभियर गार्सिया, रोबर्टाे मार्टिनेज, मौरिसियो पोचेटिनो, रोनाल्ड कोमन, लुइस इनरिके, मिकेल अर्टेटा, नुनो स्पिरिटो सान्टो र मासिमिलियानो एलेग्री बार्सिलोनाको सुचीमा रहेका छन् । यी प्रशिक्षक मध्यबाट बार्सिलोनाले एकलाई मुख्य प्रशिक्षकमा नियुक्त गर्न सक्नेछ ।