एजेन्सी – स्पेनिस क्लब रियल म्याड्रिडका प्रशिक्षक जिनेदिन जिदानले एल क्लासिको प्रतिद्वन्द्वी क्लब बार्सिलोनाका कप्तान लियोनल मेस्सी क्यापनोउमै बसेको हेर्न चाहेको बताएका छन् ।

बिहीबार राति गेटाफेविरुद्ध १–० को कठिन जित निकालेको खेलपछि पोस्टम्याच कन्फ्रेसमा जिदानले क्लब छाड्ने चर्चामा रहेका मेस्सीको विषयमा बोल्दै उनी बार्सिलोनामै रहेका हेर्न चाहेको बताएका हुन् । ‘अब के हुन्छ मलाई थाहा छैन । तर, हामी चाहन्छौं कि उनी (मेस्सी) यसै लिगमा बसून् । यो लिग उत्कृष्ट भएको हामी हेर्न चाहन्छौं,’ जिदानले भने ।

क्याडेना एसईआरका अनुसार पछिल्लो समय बार्सिलोनाको मैदान बाहिर र मैदान भित्रको विवाद छताछुल्ल भएपछि मेस्सीले क्लब छोड्ने मनसाय बनाएका छन् । मेस्सीले आफ्नो बुवा तथा एजेन्टलाई पछिल्लो एक सातादेखि बार्सिलोनामा सम्झौता नवीकरणबारे भइरहेको छलफल रोक्न आग्रह गरिसकेका छन् । ६ पटकको बालोन डिओर विजेता ३३ वर्षीय मेस्सीको बार्सिलोनासँगको सम्झौता २०२१ को समरसँगै सकिँदैछ । मेस्सी २००१ देखि बार्सिलोनामा रहेका छन् ।

३३औं चरणको खेल सकिदा रियल उपाधितर्फ लम्किदा बार्सिलोना रियलसँग ४ अंकले पछि परेको छ । कोरोना भाइरस (कोभिड–१९) अघि बार्सिलोना रियल म्याड्रिडभन्दा २ अंक अघि थियो । तर, पछिल्लो ६ खेलमा ६ अंक गुमाएपछि बार्सिलोना पछि परेको हो ।

बार्सिलोनाले ३ खेलमा जित निकाल्दा तीन खेलमा बराबरीको नतिजा निकालेको छ । रियलले भने सबै ६ खेलमा शतप्रतिशत जित निकालेको छ । शीर्षस्थानको रियलले ७४ तथा बार्सिलोनाको ७० अंक रहेको छ ।

यो पनि पढ्नुहोस : आजित मेस्सीले गरे बार्सिलोना छाड्ने निर्णय