काठमाडौं (हाम्रो खेलकुद)– कास्की जिल्ला फुटबल संघका अध्यक्ष मिलन गुरुङबाट भएको आर्थिक अनियमितताका विषयमा छानबिन गरिरहेको समितिले अनुसन्धानमा अझै केहि दिन लाग्ने बताएको छ ।

अखिल नेपाल फुटबल संघ (एन्फा) का उपाध्यक्ष वीरबहादुर खड्का संयोजक रहेको ३ सदस्यीय समितिलाई १५ दिन भित्र प्रतिवेदन बुझाउने गरि जिम्मेवारी तोकेको छ । पछिल्लो तीन दिन देखि छानबिन चलिरहेको र अझै केहि दिन लाग्न सक्ने संयोजक खड्काले जानकारी दिए । खड्कासहित सदस्य आनन्द रञ्जित र नारायण अधिकारीको टोली बुधबार पोखरा पुगको थियो ।

समितिले कास्की एन्फालाई पत्र काट्दै २०७५ मा भएको मनकामना कप अन्तर्राष्ट्रिय फुटबल प्रतियोगिता, काकस्की जिल्ला लिग फुटबल प्रतियोगिता (जिल्ला, प्रदेश) तथा अन्तर विद्यालय फुटबल महिला पुरुष प्रतियोगिताको सबै कागज पत्र र विल भपाई शुक्रबार ४ बजे सम्म उपलब्ध गराउन भनेको भनेको थियो ।

निर्देशन अनुसार धेरै कागज पत्र प्राप्त भएको र अझै केहि बाँकी रहेको पनि खड्काले बताए । खड्काले अहिले पहिलो चरणमा मनकामना कपको छानविन सकेपछि मात्र अन्य विषयमा प्रवेश गर्ने तयारी भइरहेको बताएका छन् । ‘मनकामना कप नै छानविनको मुख्य विषय हो । दुई दिन जतिमा यसको सबै अध्ययन गछौं । टिकटीको अर्धकट्टीदेखि त्यसका निर्णयसम्म मागेका छौं,’ खड्काले भने, ‘आवश्यक परे अन्य कागज पत्र पनि माग्ने छौं । त्यो सकेपछि मात्र अन्य विषयमा प्रवेश गर्नेछौं । ‘

खड्काले समितिले छानविन गर्ने र त्यसपछिको प्रक्रिया एन्फा कार्यसमितिले लिने पनि प्रष्ट पारको छन्। ‘कतिपयले हामीले नै कारवाहीको सिफारिस गर्ने सोचेका छन्,’ उनले भने,’ त्यस्तो होइन । हामीलाई छानविन गरेर १५ दिन भित्र प्रतिवेदन बुझाउने निर्देशन हो । त्यहि अनुसार काम अघि बढाइनेछ । ‘

एन्फाले कास्कीले यसअघिको कार्यसमितिले गरेको आर्थिक कारोवारको समेत छानविन गर्न प्रतिवेदनमा उल्लेख गर्न निर्देशन दिएको छ ।
एन्फाले छानबिन समितिलाई मिलन गुरुङले कास्की जिल्ला फुटबल संघको नेतृत्व सम्हालेयताको २ वर्षको र त्यसअघिको १ कार्यकालको आर्थिक हिसाबकिताब हेर्न जिम्मेवारी पाएको खड्काले बताएका छन् ।

मनकामना कपको आयव्यय सार्वजनिक नगरेको तथा कास्की फुटबल संघको अध्यक्षको हैसियतमा गुरुङले निजी खाताबाट रकम लेनदेन गरेको उजुरी अख्तियार दुरुपयोग अनुसन्धान आयोगमा समेत परेको छ । त्यस्तै फिफाको सहयोगमा कास्की एन्फाले सुरु गरेको ग्रासरुट कार्यक्रममा अभिभावकसँग प्रति खेलाडी १ हजार रुपैयाँ उठाएको र त्यसको हिसाबकिताब पनि पारदर्शी नगरेको गुरुङ माथि आरोप छ ।

एन्फाले केन्द्रीय सदस्य रत्नकुमार श्रेष्ठको संयोजकत्वमा तीन सदस्यीय छानबिन समिति गठन गरेपछि त्यसले काम गर्न सकेन । त्यसपछि एन्फाले पुन असार २ गते कार्यसमितिको आपतकालिन बैठकले खड्कालाई समितिका संयोजक तोक्दै छानविन समितिलाई काम गर्न निर्देशन दिएको थियो ।