एजेन्सी – लन्डन क्लब चेल्सी र आर्सनलले इंग्लिस प्रिमियर लिगमा सहज जित निकालेको छ । चेल्सीले घरेलु मैदानमा शनिबार राती भएको खलेमा वाट्फोर्डमाथि ३–० को सहज जित हात पारेको हो ।
स्टामफोर्ड ब्रिजमा चेल्सीको सहज जितमा ओलिभर जिरुउड, विलियन र रोस बार्कलीले गोल गरे । पहिलो हाफमा दुई तथा दोस्रो हाफमा एक सम्भव भएको थियो । खेलको २८औं मिनेटमा जिरुउडको रोस बार्कलीको पासमा गोल गर्दै चेल्सीलाई अग्रता दिलाएका थिए ।
४३औं मिनेटमा ब्राजिली विलियनले पेनाल्टीमार्फत गोल गर्दै चेल्सीलाई पहिलो हाफमा २–० को अग्रता दिलाए । इटिने कपोइले क्रिस्टियन पुलिसिसलाई अनावश्यक फउल गरेपछि रेफ्रीले चेल्सीलाई पेनाल्टी प्रदान गरेको थियो । जसमा विलियन चुकेनन् ।
दोस्रो हाफमा पनि चेल्सीले पाहुना टोलीमाथि बल पोजेसन राखेपनि थप गोलको लागि इन्ज्युरी समय नै कुर्नुपरेको थियो । इन्ज्युरी समयको थप गरिएको दोस्रो मिनेटमा रोस बार्कलीले कप्तान सिजर एज्पिलिक्वेटाको पासमा गोल गर्दै चेल्सीलाई ३–० को सहज जित दिलाए ।
जितसँगै चेल्सी ३३ खेलबाट ५७ अंक जोडेर चौथो स्थानमा यथावत रहँदा वाट्फोर्ड २८ अंक जोडेर रेलिगेसन जोनभन्दा एक स्थानमा माथि यथावत छ ।
यस्तै अर्काे खेलमा आर्सनलले वल्भ्समाथि २–० को सहज जित निकालेको छ । आर्सनलको जितमा बुकायो साका र लुकास टोरेराले गोल गरे ।
जितसँगै आर्सलन ३३ खेलबाट ४९ अंक जोडेर सातौं स्थानमा उक्लन सफल भएको छ । पराजित वल्भ्स ५२ आंक जोड्दै तालिकाको छैटौं स्थानमा यथावत छ ।
