एजेन्सी – स्पेनिस ला लिगाको ३४औं चरणमा आज (आइतबार) राति विभिन्न चार खेलहरुमा प्रतिस्पर्धा हुँदैछ । शीर्ष स्थानको रियल म्याड्रिड र दोस्रो स्थानको बार्सिलोनाले आ–आफ्नो प्रतिद्वन्द्वीको सामना गर्दैछ ।

क्याटलान क्लब बार्सिलोना भिल्लारियलको भ्रमण गर्दैछ । खेल नेपाली समय अनुसार राति १ः४५ बजे हुनेछ । उपाधि यात्रालाई जीवितै राख्न बार्सिलोनालाई भिल्लारियलविरुद्धको खेलमा जित आवश्यक छ । बराबरी या हारले बार्सिलोनाको उपाधि यात्राको सम्भावना झिनो बन्नेछ ।

आइतबार राति नै बार्सिलोनाभन्दा अगाडि रियलको खेल भएका कारण यसको फाइदा बार्सिलोनाले उठाउन सक्नेछ । रियल पराजित भएको अवस्थामा बार्सिलोनाले जित हात पारेको खण्डमा अंक दुरी १ मा छोट्याउनेछ । रियल बराबरीमा रोकिएको अवस्थामा बार्सिलोनाले जित निकाले अंक दुरी २ मा झर्नेछ ।

त्यसैले बार्सिलोना भिल्लारियलविरुद्ध जितकै लागि मैदानमा उत्रनेछ । कोरोना पछिको ६ खेलमा अपराजित रहेपनि बार्सिलोनाको प्रदर्शनमा एकरुपता नहुदा ६ अंक गुमाइसकेको छ ।

लियोनेल मेस्सी, लुइस सुआरेज, रिकार्ड पुच, इभान राकिटिच, जेरार्ड पिके र गोरक्षक मार्क आन्द्रे टेर स्टेगनजस्ता स्तरीय खेलाडीको बार्सिलोनालाई साथ छ ।

यता, शीर्ष चारको दौडमा रहेको भिल्लारियल पनि बार्सिलोनालाई पराजित गर्दै अंक तालिका सुधार्दै चौथो स्थानमा रहेको सेभिल्लासँगको अंक बराबरी गर्नेछ ।