एजेन्सी – स्पेनिस ला लिगाको शीर्षस्थानमा रहेको रियल म्याड्रिडले आइतबार भएको खेलमा एथ्लेटिक बिल्वाओलाई १-० ले पराजित गरेको छ ।

रियलले आइतबार राति भएको खेलमा घरेलु टोली एथ्लेटिको क्लब बिल्वाओको चुनौती १–० ले पन्छाउदै उपाधि यात्रालाई थप मजवुत बनाएको हो । कोरोनापछि रियलको यो लगातार शतप्रतिशत सातौ जित हो । ला लिगामा चार चरणको खेल बाँकी रहँदा रियलले तीन खेलमा जित हात पारे रियलले उपाधि जित्नेछ ।

खेलको सातौ मिनेटमा नै रियलका मार्सेलोले इनिगो कोर्डाेवाको चलाखीपुर्ण क्रसलाई उस्तै तरिकाले इनाकी विलियम्ससमक्ष पुग्न नपाउदै क्लियर गरिदिएका थिए । ३६औं मिनेटमा राहुल गार्सियाको पासमा इनाकी विलियम्सको वान भर्सेस वानकै अवस्थाको प्रहार आकासिदा घरेलु टोली अग्रता लिनबाट चुकेको थियो । पहिलो हाफको इन्ज्युरी समयमा मार्काे एसेन्सियोको पासमा बेन्जेमा गोल गर्न चुक्दा रियलले पनि खेलमा अग्ता लिने अवसर गुमाएको थियो ।

पहिलो हाफको तुलनामा रियलले दोस्रो हाफमा सुढृड खेल पस्कदै घरेलु टोलीलाई दवामा राख्दै लगातार पोस्ट आक्रमण बुनेपनि गोलका लागि पेनाल्टीको साहरा नै लिनुपर्‍यो । ६०औं मिनेटमा रोड्रिगोलाई दुई डिफेन्डरलाई कटाउदै लगेको बललाई बिल्वाओका गोलरक्षक युनाई सिमोनले अघि बढ्दै नियन्त्रणमा लिए ।

७३औं मिनेटमा रामोसले पेनाल्टीमा गोल गर्दै रियललाई १–० को अग्रता दिलाए । ७१औं मिनेटमा ड्यानी गार्सियाले मार्सेलोलाई पेनाल्टी बक्समा फउल गरेपछि रेफ्रीले भिएआरको सहायता लिदै रियललाई पेनाल्टीको मौका प्रदान गरेको थियो । जसमा कप्तान रामोस चुकेनन् । उनले ला लिगामा यो सिजन १० गोल गर्न सफल भएका छन् ।

८५औं मिनेटमा बिल्वाओले बराबरी गोल फर्काउने सुन्दर अवसर खेर फाल्यो । डि मार्काेसको प्रहारले पोस्टको गति लिन सकेन । ८७औं मिनेटमा रियलका लुका मोड्रिचको फ्लिक पासमा टोनी क्रुसले फिनिसिङ गर्न सकेन । लगत्तै करिम बेन्जेमाको प्रहारलाई बिल्वाओका गोलरक्षक युनाई सिमोनले क्लोज रेन्जबाट उत्कृष्ट बचाउ गरे । त्यसपछि थप गोल निस्कन नसक्दा रामोसको पेनाल्टी गोल नै रियललाई ३ अंक जोड्न पर्याप्त बन्यो ।

जितसँगै रियलको ३४ खेलबाट ७७ अंक पुगेको छ । जुन दोस्रो स्थानको बार्सिलोनाको भन्दा ७ अंक बढी हो । यद्धपि बार्सिलोनाले क खेल कम खेलेको छ । बार्सिलोनाले आज राति नै भिल्लारियलसँग प्रतिस्पर्धा गर्दैछ । पराजित बिल्वाओ ४८ अंक जोडेर आठौं स्थानमा रहेको छ ।