एजेन्सी – स्टार फरवार्डद्धय लुइस सुआरेज र एन्टोइन ग्रिजमनले गोल गरेपछि क्याटलान क्लब बार्सिलोनाले स्पेनिस ला लिगामा भिल्लारियलमाथि सानदार जित हात पारेको छ ।

बार्सिलोनाले घरेलु टोलीमाथि ४–१ को सानदार जित निकाल्दै शीर्षस्थानको रियल म्याड्रिडसँगको अंक दुरुी ४ मा छोट्याएको हो । जितसँगै बार्सिलोनाले उपाधि जित्ने सम्भावनालाई जीवितै राखेको छ । ला लिगामा चार खेल बाँकी रहँदा बार्सिलोनाले सबै खेलमा जित निकाल्नुका साथै शीर्षस्थानको रियलले अंक गुमाउनुपर्ने हुन्छ ।

शीर्षस्थानको रियलले आइतबार राति नै एथ्लेटिको क्लब बिल्वाओमाथि १–० को कठिन जित निकालेको थियो । बार्सिलोनाको जितमा युवा स्टार अन्सु फातीले पनि गोल गर्दा एक गोल उपहार पाएको थियो । भिल्लारियलका जेरार्ड मोरेनोले एक गोल फर्काए ।

भिल्लारियलमा आइतबार राति भएको खेलमा बार्सिलोना खेलको तेस्रो मिनेटमा नै पोउ टोरेसको आत्मघाती गोलबाट खेलमा अघि बढेको थियो । जोर्डी अल्वाको क्रसलाई भिल्लारियलका टोरेसले बचाउने प्रयास गरेपनि आफ्नै पोस्टमा गोल गर्न पुगेको थियो ।

१४औं मिनेटमा जेरार्ड मोरेनोले गोल गर्दै खेललाई बराबरीमा ल्याएका थिए । स्यामुइल चुकवुइजीबाट पाको एल्कासेर हुदै सेन्टी कार्जाेलाबाट आएको लो क्रसलाई मोरेनोले गोलमा परिणत गरेका थिए । १६औं मिनेटमा सुआरेज चुक्दा बार्सिलोनाले खेलमा अग्रता बनाउने अवसर गुमायो ।

२०औं मिनेटमा कप्तान लियोनेल मेस्सीको एकल उत्कृष्ट मुभमेन्टको पासमा सुआरेजले गोल गर्दै बार्सिलोनालाई खेलमा २–१ को अग्रता दिलाए । ३०औं मिनेटमा मोरेनोको पासमा चुकवुइजीको प्रहार क्रसबारमा लाग्दा भिल्लारियल बराबरीबाट चुकेको थियो ।

४२औं मिनेटमा मेस्सी र सुआरेजले अवसरलाई सदुपयोग गर्न सकेन । ४५औं मिनेटमा मेस्सीकै पासमा एन्टोइन ग्रिजमनले गोल गर्दै बार्सिलोनालाई पहिलो हाफमा ३–१ को आरामदायी अग्रता दिलाए । ग्रिजमनले पछिल्लो १० खेलपछि गोल गर्न सफल भएका हुन् ।

५२औं मिनेटमा कप्तान मेस्सीको प्रहारलाई भिल्लारियलका गोलरक्षक सर्जियो एसेन्जोले विफल पारे । ५८औं मिनेटमा सुआरेजको प्रहार पोस्टबाट थोरै बाहिरियो । ६९औं मिनेटमा मेस्सीले गोल गरेपनि भिएआरबाट मान्यता पाएन ।

८०औं मिनेटमा अल्वाको क्रसमा मार्टिन ब्रेथवेट चुके । ८६औं मिनेटमा सब्सिच्युट अन्सु फातीले जोर्डी अल्वाको पासमा गोल गर्दै बार्सिलोनालाई ४–१ को जितसहित ३ अंक दिलाए । फाती ७२औं मिनेटमा ग्रिजमनको स्थानमा मैदानमा प्रवेश गरेका थिए । त्यसपछि इन्ज्युरी समयमा कप्तान मेस्सीको दुई प्रयासलाई गोलरक्षक सर्जियो एसेन्जोले विफल पारे ।

जितसँगै बार्सिलोनाको ३४ खेलबाट ७३ अंक पुगेको छ । शीर्षस्थानको रियलको ७७ अंक रहेको छ । पराजित भिल्लारियल ५४ अंक जोडेर पाँचौ स्थानमा यथावत छ ।

अन्य नतिजा

स्पान्योनविरुद्ध लेगानेस (०–१)

ओसासुनाविरुद्ध गेटाफे (०–०)