एजेन्सी – खेलमा लिएको अग्रता र पेनाल्टी चुकाउँदा इन्टर मिलान इटालियन सिरी ‘ए’ मा बोलोग्नासँग २–१ ले स्तब्ध बनेको छ । यो हारसँगै इन्टरले दोस्रो स्थानको लाजियोसँगको अंक दुरी छोट्याउने मौकासमेत गुमाएको छ ।

इन्टरका रोमेलु लुकाकुले गोल गर्दा बोलोग्नाका मुसा जुवारा र मुसा बारोले गोल गरे । दुवै टोलीले १० खेलाडीमा समेटिएर खेलको अन्त्य गरेको थिए । घरेलु मैदान मिलानोमा आइतबार राति भएको खेलमा इन्टरले २२औं मिनेटमा लुकाकुको गोलबाट अग्रता बनाएको थियो ।

५७औं मिनेटमा बोलोग्नाका रोबर्टाे सोरियानो सिधै रातो कार्ड खादै मैदानबाट बाहिरिएपछि इन्टरलाई खेलमा थप सहज हुने अनुमान गरिएको थियो । ६२औं मिनेटमा लोउटारो मार्टिनेजले पेनाल्टीको मौका चुकाउदा इन्टर अग्रता दोब्बर बनाउनबाट चुक्यो ।

मिचेल डिजिक्सले इन्टरका एन्टेनियो क्यानड्रेभालाई फउल गरेपछि प्राप्त पेनाल्टीमा मार्टिनेजको प्रहारलाई गोलरक्षक लुकास्जले बचाएका थिए ।

पेनाल्टी बचाएपछि मनोवल बढेको बोलोग्नाले ७४औं मिनेटमा मुसाको गोलबाट खेललाई १–१ गोलको बराबरीमा ल्याए । ७७औं मिनेटमा इन्टर मिलान पनि १० खेलाडीमा समेटियो । एलेसान्द्रो बास्टोनी दोहोरो पँहेलो कार्ड खादै मैदानबाट बाहिरिए ।

८०औं मिनेटमा मुसा बारोले गोल गर्दै बोलोग्नालाई २–१ को अग्रता दिलाए । त्यसपछि थप गोल निस्कन नसक्दा इन्टर २–१ ले पराजित हुन पुग्यो । पेनाल्टी चुक्नु नै इन्टरको हारको टर्निङ प्वाइन्ट बन्यो ।

इन्टर ३० खेलबाट ६४ अंक जोडेर तेस्रो स्थानमा यथावत छ । बोलोग्ना ४१ अंक जोडेर नवौं स्थानमा उक्लिएको छ ।