एजेन्सी – इटालियन सिरी ‘ए’ मा नेपोली र एटलान्टाले जित हात पारेको छ । नेपोलीले रोमालाई २–१ ले पराजित गरेको हो ।

नेपोलीको जितमा जोसे मारिया कालेजोन र लोरेन्जो इन्सिग्नेले गोल गरे । रोमामा हेनरिक मिख्तारियनले गोल गरेपनि हार टार्न सकेन । सबै तीन गोल दोस्रो हाफमा सम्भव भएको थियो ।

घरेलु मैदानमा आइतबार राति भएको खेलमा नेपोलीले ५५औं मिनेटमा जोसे मारिया कालेजोनको गोलबाट अग्रता बनाएको थियो । उनले मारिया रुईको पासमा गोल गर्न सफल भएका थिए ।

त्यसको पाँच मिनेटपछि नै हेनरिखले बराबरी गोल फर्काएका थिए । उनले इडेन जेकोको पासमा गोल गरेका थिए । खेल सकिन ८ मिनेट बाँकी रहँदा लोरेन्जो इन्सिग्नेले गोल गर्दै नेपोलीलाई २–१ को जित दिलाए ।

जितसँगै नेपोलीले पाँचौ स्थानको रोमासँग अंक बराबरी गरेको छ । समान ४८ अंक भएपनि नेपोली गोल अन्तरमा पछि पर्दै छैटौ स्थानमा रहेको छ ।

यस्तै अर्काे खेलमा एटलान्टाले काग्लिएरीमाथि १–० को कठिन जित निकाल्दै अर्काे सिजनको च्याम्पियन्स लिगलाई छनोट हुने सम्भावना बलियो बनाएको छ ।

चौथो स्थानमा रहेको एटलान्टाको ३० खेलबाट ६३ अंक पुगेको छ । जुन पाँचौ स्थानको रोमाको भन्दा १५ अंक बढी हो । काग्लिएरी ३९ अंक जोडेर ११औं स्थानमा छ ।

एटलान्टाको जितमा २७औं मिनेटमा लुइस मुरेलले पेनाल्टीमार्फत गरेको गोल नै निर्णायक बन्यो ।  खेलको १२औं मिनेटमा काग्लिएरीका जियोभानी सिमिओनले गोल गरेपनि भिएआरको मान्यता पाएन ।

२७औं मिनेटमा एन्ड्रिया कार्वाेनी दोहोरो पँहेलो कार्ड खादै मैदानबाट बाहिरिएपछि घरेलु टोली काग्लिएरी १० खेलाडीमा समेटिएको थियो । त्यसमै प्राप्त पेनाल्टीमा मुरेलले गोल गरेका थिए ।