काठमाडौं (हाम्रो खेलकुद) – काठमाडौं महानगरपालिकाले काठमाडौं जिल्लाका ‘ए’ डिभिजन क्लबलाई सहयोग रकम हस्तान्तरण गरेको छ । 

महानगरपालिकाले सोमबार एक कार्यक्रमको आयोजना गर्दै काठमाडौंका ६ ‘ए’ डिभिजन क्लबलाई प्रति क्लब १० लाखका दरले ६० लाख रुपैया सहयोग रकम हस्तान्तरण गरेको हो ।

क्लबका अध्यक्ष तथा प्रतिनिधिलाई काठमाडौं महानगरपालिकाका मेयर विद्यासुन्दर शाक्य, उपमेयर हरिप्रभा खड्गी श्रेष्ठ, प्रमुख प्रशासकिय अधिकृत एक नारायण अर्याल, एन्फा अध्यक्ष कर्माछिरिङ शेर्पा लगायतले चेक हस्तान्तरण गरे । महानगरले गतवर्षदेखि यो कार्यको थालनी गरेको थियो ।

सानमिगेल मछिन्द्र क्लब, नेपाल आयल निगम मनाङ–मस्र्याङ्दी क्लब, संकटा क्लब, हिमालयन शेर्पा क्लब, न्युरोड टिम (एनआरटी) र सरस्वती क्लब महानगरबाट सहयोग रकम पाउने ‘ए’ डिभिजन क्लब हुन् । सरस्वती यसपटक ‘बी’ डिभिजनमा घटुवा भएको छ ।  महानगरका मेयर विद्यासुन्दर शाक्यले अघिल्लो वर्ष नै हुनुपर्ने कार्यक्रम केही ढिला हुन पुगेको बताउदै अर्काे वर्ष नियमित समयमै रकम हस्तान्तरण गरिने बताएका छन् ।

‘हामीले लिग अघि नै दिने योजना बनाएका थियौ । केही क्लबको आन्तरिक समस्याका कारण र कोभिड–१९ का कारण ढिला हुन पुगेको हो ।’ मेयर शाक्यले भने, ‘यो वर्ष ‘बी’ र ‘सी’ डिभिजनका क्लबलाई दिन नसकिएपनि अर्काे वर्ष यो वर्षको सहित दोब्बर गरेर दिने योजना छ ।’ महानगरले गत वर्ष ‘बी’ डिभिजनका क्लबलाई ३ लाख तथा ‘सी’ डिभिजनलाई २ लाख रुपैया प्रदान गरेको थियो ।

महानगरकी उपमेयर हरिप्रभा खड्गी श्रेष्ठ क्लबहरुलाई आवश्यक सहयोगको विषयमा छलफल भएको र निरन्तर सहयोग गर्दै जाने बताईन् ।
एन्फाका अध्यक्ष कर्माछिरिङ शेर्पाले महानगरकै सहयोगमा टुडिखेलमा पोल गाड्ने कार्यक्रम भएपनि व्यवस्थित गर्न नसकिरहेको र यस्ता किसिमको निरन्तरको सहयोगले क्लबलाई फाइदा हुने बताए ।

‘ए’ डिभिजन क्लबको तर्फबाट मछिन्द्र क्लबका अध्यक्ष प्रवोधविर सिंह कंसकारले ढिलै भएपनि पाउनुपर्ने रकम पाउदा खशुी लागेको र यस्तो किसिमको सहयोगले क्लब सञ्चालनलाई सहयोग पुग्ने बताए ।