एजेन्सी – स्पेनिस ला लिगामा सेभियाले शीर्ष चारमा बलियो पकड बनाएको छ । घरेलु मैदानमा एइवरमाथि १–० को झिनो जित निकाल्दै शीर्ष चारमा बलियो पकड बनाउदै अर्काे सिजनको लागि च्याम्पियन्स लिगलाई छनोट हुने सम्भावना बलियो बनाएको हो ।

जितसँगै सेभिल्लाको ३४ खेलबाट ६० अंक पुगेको छ । जुन पाँचौ स्थानको भन्दा ६ अंकले बढी हो । भिल्लारियलको ५४ अंक रहेको छ । एइवर ३५ अंक जोडेर रेलिगेसन जोनभन्दा एकस्थान माथि छ । रोमन सान्चेज पिजुवान स्टेडियममा घरेलु टोलीको जितमा दोस्रो हाफमा लुकास ओकम्पासले गरेको गोल नै निर्णायक बन्यो । ओकम्पासले ५६औं मिनेटमा जेसस नाभासको पासमा गोल गरेका थिए ।

२७औं मिनेटमा एइवरका टाकासी इनुइको प्रहारलाई डिफेन्डरले ब्लक गरिदिदा एइवर अग्रता लिनबाट चुकेको थियो । ४२औं मिनेटमा इभर बनेगाको पासमा फर्नान्डोको हेडरलाई गोलरक्षक मार्काे डिमिट्रोभिकले बचाए । लगत्तै लुकास ओकम्पासको हेडर पोस्टबाट थोरै बाहिरियो । पहिलो हाफको इन्ज्युरी समयमा लुकास ओकम्पास नै चुक्दा सेभिल्ला अग्रता लिनबाट चुक्यो ।

लगातारको प्रयास विफल भएपनि सेभिल्लाले ५६औं मिनेटमा गोल गर्दै अग्रता लिन सफल भयो । जेसस नाभासको क्रसमा लुकास ओकम्पासले सिक्स यार्ड बक्सभित्रबाट सहज गोल गरे । त्यसपछि पनि दुवै टोलीले केही अवसर सिर्जना गरेपनि गोल नहुदा सेभिल्ला १–० ले विजयी हुन सफल भयो ।