एजेन्सी – स्पेनिस ला लिगा अन्तर्गत शनिबार क्याटलान क्लब बार्सिलोनाले रियल भालाडोलिडको सामना गर्दैछ । भालाडोलिडको मैदान एस्टाडियो म्युनिसिपल जोसे जोरिल्लामा नेपाली समयानुसार रातको ११:१५ बजे सुरु हुनेछ ।

बार्सिलोनाले बुधबार भएको खेलमा सहरी प्रतिद्वन्द्वी एस्पान्योललाई १-० ले पराजित गरेको थियो । उक्त खेलमा लुइस सुआरेजले टोलीका लागि विजयी गोल गर्दा युवा फरवार्ड अन्सु  फातीले रातो कार्ड खाएका थिए । भालाडोलिडले भने मंगलबारको खेलमा भ्यालेन्सियासँग २-१ को हार बेहोरेको थियो ।

गत सिजन १६ औं स्थानमा रहँदै लिग अन्त्य गरेको भालाडोलिड लिगको ३ खेल बाँकी रहँदा १४ औं स्थानमा छ । तुलनात्मक रुपमा राम्रो प्रदर्शन गरेको भालाडोलिड १२ औं स्थानको लेभानतेभन्दा मात्र ४ अंक पछाडी छ । यसपछि एइबार र रियल बेटिसको सामना गर्ने भएकाले टोलीले राम्रो स्थान हासिल गर्ने अपेक्षा गरिएको छ ।

बार्सिलोना शीर्षस्थानको रियल म्याड्रिडभन्दा ४ अंकले पछाडी छ । आजको खेलमा जित हासिल गरे दुई टोलीबीचको दुरी १ अंकमा झर्नेछ । बार्सिलोनाले यसपछि लिगमा ओसासुना र अलाभेसको सामना गर्नेछ । लिग उपाधि होड कायम राख्न बार्सिलोनालाई जितको विकल्प छैन । यदि बार्सिलोनाले आजको खेल हारेर रियलले आफ्नो खेल जितेमा रियलले २ खेल बाँकी रहँदै ला लिगा उपाधि जित्नेछ ।

घरेलु टोली भालाडोलिडका लागि ओस्कार प्लानो टोलीमा फर्कंदा ५ खेलाडी चोटका कारण बाहिर रहेका छन् । जोसे कारो, माइकल जभालोयास, मिगुएल डेला फ्लुएन्टे, मथिअस फर्नान्डेस र पेड्रो पोर्रो टोलीमा रहने छैनन् । फ्रान्सेली विंगर हाटेम बेन आर्फाले पछिल्लो खेलमा प्रभाव जमाउन नसकेपछि यस खेलमा पाब्लो हेर्भिअसले मौका पाउन सक्नेछन् ।

बार्सिलोनाका लागि ओस्मान डेम्बेले चोटका कारण मैदानबाहिर छन् । फाती पनि पछिल्लो खेलमा रातो कार्ड पाएका कारण निलम्बनमा छन् । स्यामुएल उम्टिटी र जुनिअर फिर्पो खेल्नेमा अझैपनि शंका छ । मिडफिल्डर फ्रेंकी डे योङ भने प्रशिक्षणमा फर्केका कारण खेल्ने सम्भावना छ ।

नेल्सन सेमेडो टोलीबाट बहिरिंदा आर्टुरो भिडाल मिडफिल्ड र सर्जी रोबर्टो राइट ब्याकमा खेल्ने सम्भावना छ । आक्रमणमा कप्तान लिओनेल मेस्सीलाई लुइस सुआरेज र एन्टोइन ग्रिजमनले साथ दिनेछन् । बेन्चमा आक्रामक खेलाडीको कमी रहने कारण बार्सिलोनाले आर्थरलाई वैकल्पिक खेलाडीका रुपमा आक्रामक भूमिकामा खेलाउन सक्छ ।