एजेन्सी – पेप ग्वार्डिओला बार्सिलोनाको प्रशिक्षक रहँदा क्याटलान क्लबले २ सय ४७ खेल खेल्दा १४ उपाधि जितेको थियो । अहिले रियल म्याड्रिडका प्रशिक्षक जिनेदिन जिदानले ग्वार्डिओलाको भन्दा राम्रो नतिजा दिइरहेका छन् ।

जिदानको सफलताको औसत ग्वार्डिओलाको भन्दा राम्रो छ । जिदानले औसतमा १९ खेलमा एउटा उपाधि जितेका छन् भने ग्वार्डिओलाले त्यति नै सफलताका लागि २२ खेल कुर्नुपरेको छ । अहिले म्यानचेस्टर सिटीका प्रशिक्षक रहेका ग्वार्डिओलाको बार्सिलोनामा रहँदाको औसतलाई मात्र हेर्ने हो भने जिदानको भन्दा राम्रो छ । उनले हरेक १८ खेलमा उपाधि जितेका थिए ।

यी दुई सफल प्रशिक्षकबीच शुक्रबार च्याम्पियन्स लिगको प्रिक्वार्टरफाइनलको दोस्रो लेगमा एकअर्काको सामना गर्दैछन् । पहिलो लेगमा सिटीले रियलको मैदानमा पुगेर २–१ को जित निकालेको थियो ।

दुई आक्रामक प्रशिक्षक

जिदानसँग युरोपका शीर्ष ५ लिगमा खेल्ने टोलीहरु मध्ये उत्कृष्ट रक्षापंक्ति भएको टोली छ । उता ग्वार्डिओलासँग भने बलियो आक्रमण फरवार्ड लाइन छ । यो सिजन सिटीले प्रिमियर लिगमा १ सय २ गोल गरेका थियो । दुवै प्रशिक्षक रक्षात्मक रणनीतिभन्दा आक्रामक फुटबल खेल्न रुचाउँछन् । औसतमा रियलले प्रति खेलमा २.४ र सिटीले भने २.५८ गोल गरिरहेको छ ।

खेल जित्ने प्रतिशतमा पनि स्पेनिस ग्वार्डिओला माथि छन् । ६ सय ३९ खेलमा उनले ७३.८ प्रतिशत खेलमा जित हासिल गरेका छन् । उनले ७४ खेल मात्र हारेका छन् । फ्रान्सेली प्रशिक्षकले ६७.१४ प्रतिशत खेल जितेका छन् । २ सय १० खेलमा उनले २६ खेल मात्र गुमाएका छन् ।

लिगसहित जिदानले ११ उपाधि जितेका छन् । उनको नेतृत्वमा रियलले ९ फाइनल खेल्दा सबैमा उपाधि जितेका छन् । जसमा उनको टोलीले लगातार तीन पटक च्याम्पियन्स लिग उपाधि जितेको थियो । तर, ग्वार्डिओलाको त्यस्तै कीर्तिमान भने छैन । उनले बार्सिलोना छाडेयता च्याम्पियन्स लिग जितेका छैनन् ।

घरेलु फुटबलमा भने ग्वार्डिओलाले निकै सफलता हासिल गरेका छन् । त्यसमा पनि लिगमा उनले विशेष सफलता प्राप्त गरेका छन् । उनले त्यसरी ८ उपाधि जितेका छन् । चार वर्ष बार्सिलोनामा रहँदा उनले एक पटक मात्र लिग उपाधिबाट विमुख हुनु परेको थियो । त्यति बेला रियलले लिग जितेको थियो । बायर्न म्युनिखले उनको नेतृत्वमा ३ पटक बुन्डेसलिगा जितेको थियो । त्यस्तै सिटीमा ४ वर्ष बिताउँदा २ पटक प्रिमियर लिग जितेका छन् ।

यी दुई सफल प्रशिक्षकबीचको हेड टु हेडमा ग्वार्डिओला माथि रहेका छन् । अब उनको ध्यान रियल आफ्नो मैदानमा आउँदा अर्को सफलता प्राप्त गर्नु हुनेछ । सिटीको पहिलो पटक च्याम्पियन्स लिग उपाधि जित्ने सपना यो सिजन पुरा गर्ने सम्भावनालाई कायम राख्न शुक्रबार रियलको चुनौती पार गर्नुपर्ने हुन्छ ।