एजेन्सी – स्पेनिस ला लिगा च्याम्पियन रियल म्याड्रिडका जापानी युवा स्टार ताकेफुसा कुवोले अर्काे सिजन स्पेनिस क्लब भिल्लारियलबाट खेल्ने भाका छन् । उनी एक सिजनका लागि लोनमा अनबुन्धित भएका हुन् ।

अघिल्लो समरमा रियलले बार्सिलोनाको एकडेमी ला मासियाबाट  खेलिसकेका कुवोलाई अनुबन्ध गरेको थियो । रियलको पहिलो टिममा पर्ने पक्का नभएपछि रियलले कुवोलाई लोनमा रियल मालोर्का पठाएको थियो । कुवोको थप क्षमता विकासको लागि रियलले कुवोलाई लोनमा खेलाइरहेको छ । कुवोले मालोर्कामा उच्च प्रदर्शन गर्दै आफ्नो छाप छोड्न सफल भएपनि मालोर्का शीर्ष डिभिजनमा रहन सकेन ।

कुवोलाई अनुबन्ध गर्न जर्मन क्लब बायर्न म्युनिख, स्पेनिस क्लब ओसासुना, सेलटा डि भिगो र ग्रानडाले चासो देखाएपनि आकर्षक प्रस्ताव ल्याएपछि रियलले कुवोलाई भिल्लारियल पठाउन सहमत भएको हो । सम्झौताअनुसार भिल्लारियलले कुवोका लागि ३ मिलियन पाउन्ड खर्चिएको छ । यस विषयमा दुवै क्लबले केही दिनमै सार्वजनिक गर्ने बताएका छन् । रियलले अर्काे सिजनबाट मात्रै कुवोलाई शीर्ष टोलीमा राख्न सक्नेछ ।

अब कुवोले भिल्लारियलका नयाँ प्रशिक्षक युनाई इम्रीको प्रशिक्षणमा खेल्नेछन् । इम्रीलाई भिल्लारियलले दुई साताअघि मुख्य प्रशिक्षकमा नियुक्त गरेको थियो । भिल्लारियल युरोपा लिगमा छनोट भएकाले पनि कुवोले आफ्नो प्रतिभा थप निखार्ने अवसर पाउनेछन् । रियलले आफ्नो सिनियर टोलीमा आउनुपूर्व नै कुवोलाई युरोपेली अनुभव दिन चाहन्छ ।

रियलले यसै सिजन कुवोलाई शीर्ष टोलीमा राख्ने चाहना रहेपनि युरोपबाहिरको खेलाडीमा कोटा पुगेका कारण कुवोलाई थप एक सिजन लोनमा पठाउन बाध्य भएको हो । स्पेनिस ला लिगामा युरोप बाहिरबाट तीन खेलाडी मात्रै राख्न पाउने प्रावधान छ ।

हाल रियलमा युरोप बाहिरको भिनिसियस जुनियर, रोड्रिगो र इडर मिलिटाओ रहेका छन् । अर्काे सिजन भिनिसियसले स्पेनिस पासपोर्ट लिएपछि कुवोले रियलको टोलीमा अवसर पाउनेछन् । भिनिसियस हाल स्पेनी पासपोर्ट लिन योग्य भएपनि कोरोनाका कारण उनको कागजी प्रक्रियामा ढिलाई हुन पुगेको हो ।