एजेन्सी – फ्रान्सेली च्याम्पियन पेरिस सेन्ट जर्मेन (पीएसजी) का ब्राजिलियन स्टार फरवार्ड नेयमार जुनियरले इटालियन क्लब एटलान्टाको सबै खेलाडीको कुल तलबभन्दा बढी तलब बुझ्ने गर्दछन् ।

यूईएफए च्याम्पियन्स लिगको क्वाटरफाइनल चरणमा पीएसजीले एटलान्टाको सामना गर्दैछ । एकातिर मोटो रकम बुझ्दै विश्व फुटबलमा चर्चा कमाएको स्टारहरुको जमात छ भने अर्को तर्फ इटालियन लिग र च्याम्पियन्स लिगमा यस सिजन आक्रामक फुटबल खेल्दै प्रभाव जमाएको एटलान्टा । दुवै टोली पहिलो पटक च्याम्पियन्स लिगको सेमिफाइनलमा प्रवेश गर्ने दाउमा हुनेछन् ।

पीएसजीले पछिल्लो केहि वर्षयता मोटो रकम खर्चेर स्टार खेलाडीको जमात जम्मा गरेपनि क्वाटरफाइनल चरण पार गर्न सकेको छैन । एटलान्टा भने पहिलो सहभागितामै क्वाटरफाइनल पुगेकाले यसलाई अझ टाढा पुर्याउन तत्पर छ । स्टार खेलाडी नभएपनि प्रदर्शनमा एकरुपता देखाइरहेको एटलान्टा पीएसजीको लागि खतरनाक हुनसक्छ ।

पीएसजीका ब्राजिलियन फरवार्ड नेयमारले वार्षिक ३६ मिलियन युरो आर्जन गर्ने गर्दछन् । बार्सिलोनाबाट विश्व कीर्तिमानी रकममा अनुबन्ध गर्दा उनले गरेको सम्झौता प्रदर्शन अनुसार परिमार्जित हुँदै आएको छ । यता एटलान्टामा भने सर्वाधिक कमाउने खेलाडीको रुपमा कप्तान आलेजान्द्रो गोमेज, दुभान जपाटा र लुइस मुरिएलले वार्षिक १.२ मिलियन युरो मात्र बुझ्ने गर्दछन् ।

एटलान्टाले वार्षिक रुपमा खेलाडीको तलबमा ३३ देखि ३६ मिलियन युरो मात्र खर्चने गरेको छ । यो रकम नेयमारको बोनससहित तलबभन्दा कम हो । पीएसजीमा नै फरवार्ड किलियन एमबाप्पेले वार्षिक १६ मिलियन युरो तथा थियागो सिल्भाले ११ मिलियन युरो आर्जन गर्दछन् ।

पीएसजीका नेयमार, एमबाप्पे र माउरो इकार्डीको तलब मात्र वार्षिक ५५ मिलियन युरो पुग्न आउँछ । यता एटलान्टाका शीर्ष तीन फरवार्डको तलब भने ४ मिलियन युरोको हाराहारी हुन आउँछ ।