एजेन्सी – विगतको च्याम्पियन्स लिगभन्दा यो सिजनको च्याम्पियन्स लिगको क्वाटरफाइनल चरणदेखि खेल एक लेगको अवधारणामा हुँदैछ । युरोपियन फुटबलको सर्वाेच्च निकाय (यूईएफए) ले कोरोना महामारीपछि क्वाटरफाइनल र सेमिफाइनलको डबल लेगलाई एक लेगमा खेलाउने योजना बनाएको छ ।

यतिमात्र होइन यूईएफएले अब सबै खेल मिनि टुर्नामेन्टको रुपमा पोर्चुगलको लिस्वनमै खेलाउने निर्णय गरेको छ । यूईएफएको यो अवधारणा अनुसार आजदेखि पोर्चुगलमा क्वाटरफाइनलको खेल बन्द रंगशालामा आयोजना हुँदैछ । जसमा बेन्फिका र स्पोर्टिङ लिस्वनको मैदानमा १२ दिनसम्म सात खेल हुनेछ र एक टोली च्याम्पियन बन्नेछ ।

कोभिड–१९ को महामारी नफैलिएको भए च्याम्पियन्स लिगको फाइनल मे महिनामै टर्कीको इस्तानबुलमा सम्पन्न भइसक्ने थियो । इस्तानबुलले सबै खेललाई आयोजना गर्न नसक्ने बताएपछि युइएफएले लिस्वनमा च्याम्पियन्स लिगको बाँकी खेल गराउने निर्णय गरेको थियो ।

च्याम्पियन्स लिग ६ वर्षपछि लिस्वनमा फर्किएको हो । लिस्वनले यसअघि २०१४ को च्याम्पियन्स लिगको फाइनल आयोजना गरेको थियो । जहाँ दुई स्पेनिस क्लब रियल म्याड्रिड र एट्लेटिको म्याड्रिडले प्रतिस्पर्धा गरेका थिए । त्यहाँ रियल च्याम्पियन बनेको थियो ।

यसपटक क्वाटरफाइनलमा इटालियन क्लब एटलान्टा र फ्रेन्च क्लब पेरिस सेन्ट जर्मेन (पीएसजी), जर्मन क्लब आरबी लाइप्जिग र स्पेनिस एट्लेटिको मड्रिड, स्पेनिस बार्सिलोना र जर्मन बायर्न म्युनिख तथा इंग्लिस म्यानचेस्टर सिटी र फ्रान्सेली क्लब लियोनबीच प्रतिस्पर्धा हुदैछ ।

क्वाटरफाइनलको पहिलो दिन बुधबार राति बेन्फिाकाको मैदानमा इटालियन क्लब एटलान्टा र फ्रेन्च क्लब पेरिस सेन्ट जर्मेन (पीएसजी) बीच प्रतिस्पर्धा हुँदैछ । लाइप्जिग र एट्लेटिको खेल लिस्वनको मैदानमा बिहीबार राति हुनेछ ।

शुक्रबार राति बार्सिलोना र बायर्न म्युनिखको खेल बेन्फिकाको मैदानमा हुनेछ । अन्तिम क्वाटरफाइनलमा शनिबार राति म्यानचेस्टर सिटी र लियोनबीचको खेल लिस्वनको मैदानमा हुनेछ । सेमिफाइनल मंगलबार र बुधबार राति तथा फाइनल आइतबार राति हुनेछ ।