एजेन्सी – यूईएफए च्याम्पियन्स लिग अन्तर्गत क्वाटरफाइनल चरणको तयारीमा रहेको क्याटलान क्लब बार्सिलोनाको एक खेलाडीलाई पनि कोरोना संक्रमण देखिएको छ ।

बार्सिलोनाले बुधबार दिउँसो एक विज्ञप्ति जारी गर्दै टोलीका एक खेलाडीलाई कोरोना संक्रमण भएको पुष्टि गरेको हो । यधपी संक्रमित खेलाडी च्याम्पियन्स लिग खेल्ने टोलीमा भने नरहेको क्लबले बताएको छ । बार्सिलोनाले च्याम्पियन्स लिग टोलीमा नपरेका ९ खेलाडीलाई हाल प्रि-सिजन प्रशिक्षणका लागि बोलाएको थियो । तिमध्य एक खेलाडीमा संक्रमण देखिएको हो ।

क्लबले जारी गरेको विज्ञप्तिमा लेखिएको छ, ‘मंगलबार दिउँसो गरिएको पीसीआर परिक्षणमा ९ खेलाडी रहेको प्रि-सिजन प्रशिक्षणबाट एक खेलाडीलाई कोरोना संक्रमण देखिएको छ । उनलाई कोरोनाको कुनै लक्षण देखिएको छैन । स्वस्थ नै रहेका उनी हाल आफ्नै निवासमा क्वारेन्टिनमा छन् ।’

क्लबले यस विषयमा सम्बन्धित खेल र स्वास्थ्य निकायमा जानकारी गराएको छ । खेलाडीसँग सम्पर्कमा आएका सबैलाई पुन: पीसीआर टेस्ट गर्न लगाइएको छ । च्याम्पियन्स लिग टोलीमा रहेको सबै खेलाडी हाल लिस्बन जान छुट्टै बसेकाले संक्रमणको डर नरहेको क्लबले जनाएको छ । बार्सिलोना शुक्रबार हुने खेलको लागि बिहीबार त्यसतर्फ प्रस्थान गर्दैछ ।

प्रि सिजन प्रशिक्षणमा बार्सिलोनाबाट लोनमा अन्यत्र गएका खेलाडी र हालै अनुबन्धित खेलाडी रहेका छन् । पेड्री, त्रिन्काओ, माथिअस फर्नान्डेस, टोबिदो, वागे, कार्लेस एलेना, राफिन्हा, मिरान्डा र ओरिओल बुस्केट्स प्रशिक्षणमा रहेका थिए ।

यसअघि स्पेनिस टोली एटलेटिको म्याड्रिडका दुई खेलाडीमा पनि कोरोना संक्रमण देखिएको थियो । सोमबार क्लबले विज्ञप्ति जारी गर्दै एन्जल कोरिया र सिमे भर्साल्कोमा कोरोना संक्रमण देखिएको जनाएको थियो ।

दुवै खेलाडीमा कुनै लक्षण नदेखिएपनि उनीहरु होम क्वारेन्टिनमा छन् र च्याम्पियन्स लिगको खेल गुमाउनेछन् । एटलेटिकोले बिहीबार जर्मनीको आरबी लाइप्जिगको सामना गर्दैछ ।