एजेन्सी – यूईएफए च्याम्पियन्स लिगमा आज राति क्वाटरफाइनलक चरणको पहिलो खेल हुँदैछ । इटालियन क्लब एटलान्टा र फ्रेन्च क्लब पेरिस सेन्ट जर्मेन (पीएसजी) बीच सेमिफाइनलमा पुग्न प्रतिस्पर्धा हुनेछ ।

खेल पोर्चुगलको लिस्वनस्थित बेन्फिकाको खेल मैदानमा नेपाली समयअनुसार राति १२ः४५ बजेपछि हुनेछ । यि दुई टोली पहिलोपटक एक आपसमा भिड्न लागेका हुन् । यो सिजन फ्रेन्च फुटबलमा तीन उपाधि जितेको पीएसजी एटलान्टालाई पनि पराजित गर्दै २५ वर्षपछि पहिलोपटक सेमिफाइनल पुग्ने दाउमा हुनेछ । चोटग्रस्त फ्रेन्च फरवार्ड केलियन एमबाप्पेको आगमनले पीएसजी उत्साहित देखिएको छ ।

एमबाप्पे चोटबाट मुक्त भनेपनि पूर्ण फिट भने छैनन् । उनले सुरुवाती रोजाईमा खेल्नैमा शंका छ । पीएसजीका लागि ब्राजिली स्टार नेयमार मुख्य हतियार हुनेछन् । मौउरो इकार्डी, पाब्लो साराबिया, माक्र्युन्योस, एन्डर हेरेरा, थियागो सिल्भा र केलर नाभासजस्ता खेलाडीले महत्त्वपूर्ण भूमिका खेल्नुपर्ने छ । प्रतिबन्धका कारण एन्जल डि मारिया र चोटका कारण लेभिन कुर्जावा र मार्काे भेराट्टी टोलीमा हुनेछैन । उनीहरुको अभाव पीएसजीलाई खड्कन सक्नेछ ।

सन् २०१६ पछि पहिलोपटक क्वाटरफाइनलमा प्रवेश गरेको पीएसजी कोरोनापछि पछिल्लो ६ खेलमा अपराजित रहेको छ । यसक्रममा पीएसजीले चार मैत्रीपुर्ण र दुई फाइनल खेल खेल्दै दुवैमा उपाधि जित्न सफल भएको थियो ।

यता, पछिल्ला वर्षहरुमा उत्कृष्ट प्रदर्शन गरिरहेको एटलान्टा पनि पीएजीलाई स्तब्ध पार्दै सेमिफाइनल पुग्ने दाउमा हुनेछ । च्याम्पियन्स लिगमा उच्च प्रदर्शन गरिरहेको एटलान्टा क्लब इतिहासमा पहिलोपटक क्वाटरफाइनलमा प्रवेश गरेको हो । तर, बलियो पीएसजीलाई हराउन सहज हुनेछैन ।

एटलान्टाका लागि डुभाज जापटा मुख्य हतियार हुनेछ । मारियो पासालिस, एलजान्द्रो गोमेज, रोविन गोसेन्स र गोलरक्षक पिएरलुइगी गोल्लिनी जस्ता खेलाडी पीएसजीविरुद्धको खेलमा उत्रनेछन् । मुख्य फरवार्ड जोसिप इलिचिच भने व्यक्तिगत कारणले टोलीमा छैनन् । पछिल्लो २० मध्ये १९ खेलमा अपराजित एटलान्टाले सिरी ‘ए’ मा इन्टर मिलानसँग पराजित भएयता हार बेहोरेको छैन ।

खेलको फाइनल स्कोर अनुमान लगाउनुहोस् र जित्न्नुहोस् केल्मी नेपालको तर्फबाट आकर्षक गिफ्ट ह्याम्पर