एजेन्सी – गत सिजन जर्मन बुन्डेसलिगामा उपविजेता बनेको बोरुसिया डर्टमुन्डले नयाँ सिजनको तयारीस्वरूप अष्ट्रियाको अल्टाकसँग मैत्रीपूर्ण खेलमा ६-० को फराकिलो जित दर्ता गरेको छ ।

अल्टाकको घरेलु मैदान क्यासपोइन्ट एरिनामा डर्टमुन्डले दुवै हाफमा ३-३ गोल गरेको थियो । डर्टमुन्डले पहिलो र दोस्रो हाफमा फरक टोली उतारेपनि आक्रमणमा निकै सुदृढ देखिएको थियो । खेलको १३ औं मिनेटमा नै जिओभानी रेइनाले गोल गर्दै डर्टमुन्डलाई अग्रता दिलाए । उनले एर्लीङ हालान्डको पासमा गोल गरेका थिए ।

पहिलो गोलमा असिस्ट दिएका हालान्डले ३६ औं मिनेटमा पेनाल्टीमा गोल गर्दै डर्टमुन्डको अग्रता दोब्बर पारे । हालान्डलाई पेनाल्टी क्षेत्रभित्र लडाएपछि प्राप्त पेनाल्टीमा उनैले गोल गरेका थिए । पहिलो हाफको इन्ज्युरी समयमा जुड बेलिन्घमको उत्कृष्ट ब्याकहिल पासमा हालान्डले गोल गर्दै ३-० को अग्रता दिलाए ।

दोस्रो हाफमा नयाँ टोली उतारेको डर्टमुन्डले अर्को गोलको लागि आधा घण्टा संघर्ष गर्नुपर्यो । अल्टाकका गोलरक्षकले थोर्गन हाजार्डलाई पेनाल्टी क्षेत्रभित्र लडाएपछि हाजार्ड आफैंले पेनाल्टीको सदुपयोग गरेका थिए । ८५ औं मिनेटमा एमरे च्यानले थोमस मुनिएरको पासलाई सदुपयोग गर्दै ५-० को अग्रता दिलाए । ९० औं मिनेटमा जुलियन ब्रान्टले गोल गर्दै डर्टमुन्डको फराकिलो जित पक्का गरे ।

डर्टमुन्डले अब अर्को मैत्रीपूर्ण खेलमा आइतबार अष्ट्रिया वाइनको सामना गर्नेछ । अगस्ट अन्तिम सातामा डर्टमुन्डले पाडेरबर्नको अतिथ्यता गर्ने तालिका छ ।