एजेन्सी – च्याम्पियन्स लिगमा म्यानचेस्टर सिटीसँग पराजित भएसँगै रियल म्याड्रिडको यो सिजनको अन्त्य भएको थियो । कोभिड १९ को संक्रमणका कारण स्थगित लिग पछि सुरु हुँदा रियलले उच्च प्रदर्शन गर्यो । जसका कारण टोली ला लिगका जित्न सफल भएको थियो ।

सिजनको अन्त्यपछि टोलीका जनरल म्यानेजर जासे एन्जल सान्चेजले खेलाडीको टोलीलाई सम्बोधन गर्ने क्रममा आउने सिजनका लागि टोलीमा नयाँ खेलाडी थप्ने योजना नभएको सुनाएका थिए । उनले च्याम्पियन्स लिगबाट टोली बाहिरिएपछि समग्रमा व्यवस्थापन टोलीको प्रदर्शनबाट सन्तुष्ट रहेको पनि सोही अवसरमा बताएका थिए ।

सान्चेजले पीएसजीबाट लोनमा आएका गोलरक्षक अल्फन्स एरोलाले भने टोली छाड्ने निश्चित भएको जानकारी दिँदै उनले स्थायी रुपमा उनर्ला लिनका लागि क्लबको आर्थिक अवस्था बलियो नरहेको प्रष्ट पारेका थिए । कोभिड १९ कै कारण नयाँ खेलाडी लिन नसकिने पनि उनले टोलीका खेलाडीलाई जानकारी दिए ।

रियलबाट अन्यत्र क्लबमा लोनमा गएका खेलाडी क्लबमा फर्कन सक्ने सम्भावना रहेको पनि उनले बताए । प्रशिक्षक जिनेदिन जिदानले मार्टिन ओडेगार्डलाई रियल सोसीडाडबाट फिर्ता बोलाउने निर्णय गर्दै अर्को सिजन सिनियर टोलीमा रहने पक्का गरिसकेका छन् । यस्तै ड्यानी सेबालोस र गोलरक्षक आन्द्रे लुनिनको पनि टोलीमा फर्कने बलियो सम्भावना छ । मिडफिल्डर ताकेफुसा कुबो भने एक सिजनका लागि लोनमा भिल्लारियल पुगिसकेका छन् ।

रियलका अध्यक्ष फ्लोरेन्टिनो पेरेजले पनि अहिलेको कठिन अवस्थामा ठूला खेलाडीसँगको सम्झौताका लागि केहि समय कुर्नुपर्ने बताएका थिए । नयाँ सिजन अघिको ब्रेकको समयमा खेलाडीले आफनो जिम्मा आफै लिनुपर्ने पनि जनाएको थियो । टोली अगष्ट ३० सम्म विश्राममा रहनेछ ।