एजेन्सी – स्पेनिस टोली एटलेटिको म्याड्रिडलाई पराजित गर्दै जर्मन क्लब आरबी लाइप्जिग यूईएफए च्याम्पियन्स लिगको सेमिफाइनलमा प्रवेश गरेको छ । लिस्बनमा भएको क्वाटरफाइनलमा लाइप्जिग २-१ ले विजयी रहयो ।

पहिलो हाफ गोलरहित बराबरीमा सकिएपछि दोस्रो हाफमा तीन गोल सम्भव भएको थियो । लाइप्जिगले ड्यानी ओल्मोको गोलमा अग्रता लिएपनि वैकल्पिक खेलाडी जोआओ फेलिक्सले एटलेटिकोलाई खेलमा फर्काएका थिए । तर खेलको २ मिनेट समय बाँकी रहँदा बेन्चबाट आएका टाइलर एडम्सले गोल गर्दै लाइप्जिगको जित पक्का गरे ।

खेलको छैटौं मिनेटमा नै लाइप्जिगले अग्रता लिने सुवर्ण अवसर गुमायो । डिफेन्डर मार्सेल हाल्सटनबर्गले पेनाल्टी क्षेत्र भित्रबाट गरेको भली प्रहारले पोस्टको दिशा लिन सकेन । ११ औं मिनेटमा रेएटलेटिकोका नान लोडीको लामो फ्रिकिकमा स्टेफान साभिचको हेडरलाई गोलरक्षक पिटर गुलाचीले सहजै बचाए ।

१४ औं मिनेटमा गोलरक्षक गुलाचीले यानिक फरेरा करास्कोको प्रहारलाई विफल पारे । २१ औं मिनेटमा करास्कोकै फ्रिकिकलाई हाल्सटनबर्गले क्लियर गर्दै सम्भावित खतरा टारे । खेलको ३४ औं मिनेटमा हेडरको प्रयास गर्ने क्रममा एटलेटिको म्याड्रिडका स्टेफान साभिच र हाल्सटनबर्गको टाउको जुध्दा चोटका कारण केहीबेर खेल रोकिएको थियो ।

इन्ज्युरी समयको दोस्रो मिनेटमा लाइप्जिगका डायोट उपामेकानोले कर्नरबाट आएको बलमा प्रहार गरेको हेडर गोलरक्षक यान ओब्लाकले बचाए । लगत्तै लोडीको फ्रिकिकमा साभिचको हेडरले पोस्टको दिशा लिन सकेन । पहिलो हाफमा लाइप्जिगले बल पोसेसनमा पकड बनाएपनि एटलेटिको काउन्टर अट्याकमा आक्रमण बुन्न सफल भएको थियो ।

खेलको ५१ औं मिनेटमा लाइप्जिगले ओल्मोको गोलमा अग्रता लियो । कप्तान साबिट्जरले दायाँ विङ्गबाट दिएको क्रसलाई ओल्मोले पेनाल्टी क्षेत्र भित्रबाट हेडरमार्फत गोल गरेका थिए । लगत्तै अर्कोतर्फ मार्कोस लोरेन्टेले बराबरी गर्ने अवसर पाएपनि गोलरक्षक गुलाचीले खतरा टारे ।

७० औं मिनेटमा लुकास कोल्स्टरम्यानले युवा फरवार्ड जोआओ फेलिक्सलाई पेनाल्टी क्षेत्रभित्र लडाएपछि रेफ्रीले पेनाल्टी दिए । मैदान प्रवेश गरेको १२ मिनेट नबित्दै फेलिक्सले आफैंले प्राप्त गरेको पेनाल्टीमा गोल गर्दै खेल बराबरीमा ल्याए ।

खेलको ८८ औं मिनेटमा लाइप्जिगले पुन: अग्रता लियो । एन्जेलिनोको पासमा टाइलर एडम्सले पेनाल्टी क्षेत्रको ठिक बाहिरबाट गरेको प्रहार डिफेन्डर लोडीलाई लाग्दै गोलमा परिणत भएको थियो ।

लाइप्जिगले अब सेमिफाइनलमा फ्रान्सेली क्लब पेरिस सेन्ट जर्मेन (पीएसजी) को सामना गर्नेछ । पीएसजीले बुधबार राति एटलान्टालाई २-१ ले पराजित गर्दै अन्तिम चारमा स्थान बनाएको थियो ।