एजेन्सी – ब्राजिलियन विंगर विलियनले इंग्लिस क्लब चेल्सी छाड्दै लन्डनकै अर्काे क्लब आर्सनलसँग सम्झौता गरेका छन् ।

आर्सनलले ३२ वर्षे विलियनलाई फ्रि ट्रान्सफरमा तीन वर्षको लागि अनुबन्ध गरेको हो । सम्झौता अनुसार उनी सन् २०२४ सम्म आर्सनलमा रहनेछन् । विलियनले चेल्सीसँग तीन वर्षको सम्झौता मागेपनि चेल्सीले त्यसलाई पुरा नगरेपछि उनले क्लब छाडेका थिए । चेल्सीले दुई वर्षको नविकरण गर्ने प्रस्ताव राखेकोमा सहमति हुन सकेको थिएन ।

सम्झौता अनुसार विलियनले प्रतिसाता २ लाख २० हजार पाउन्ड पारिश्रमिक पाउने बुझिएको छ । भेट्रान खेलाडीको लागि आर्सनलले मोटो रकम खर्चिएको भन्दै समर्थकहरुले आलोचना समेत गरेका छन् । आर्सनलका प्रशिक्षक मिकेल आर्टेटाले टोलीमा आवश्यक खेलाडी भएकाले उनलाई अनुबन्ध गर्न क्लबले प्राथमिकता बनाएको बताए ।

‘विलियन हाम्रो टोलीमा प्रभाव बनाउन सक्ने खेलाडी हुन् । हामीले उनलाई पछिल्लो केहि महिनादेखि नै हेरिरहेका थियौं । उनले आक्रामक मिडफिल्डर र विंगरको भूमिका निर्वाह गर्न सक्छन् । विश्व फुटबलमा उनले प्रसस्त अनुभव बटुलेका छन् र हामीलाई आफ्नो लक्ष्यमा पुग्न निकै सहयोग मिल्नेछ,’ आर्टेटाले भने ।

विलियनले यो सिजन चेल्सीका लागि ४७ खेलमा ११ गोल र ९ गोलको लागि सहायता दिएका थिए ।
उनी २०१३ मा रसियन क्लब एन्जि माखाचाख्लाबाट चेल्सीमा आएका थिए । समग्रमा विलियनले चेल्सीका लागि ३३९ खेलमा ६३ गोल गरेका छन् । उनले चेल्सीबाट दुई पटक इंग्लिस प्रिमियर लिग र समान एकपटक एफए कप, इएफएल कप र युरोपा लिग जितेका छन् ।