एजेन्सी – बार्सिलोनाका कप्तान सुपरस्टार लियोन मेस्सीले च्याम्पियन्स लिग क्वार्टरफाइनलको लज्जास्पद हारपछि आफ्नो निराशा लुकाउन सकेनन् । लिस्बनमा शुक्रबार बार्सिलोनालाई बुन्डेसलिगा च्याम्पियन बायर्न म्युनिखले ८–२ ले हराएको थियो ।

कोभिड १९ कारण एक खेलमा मात्र भएको क्वार्टरफाइनलमा बार्सिलोनामाथि सानदार जित निकाल्दै बायर्न सेमिफाइनल पुगेको छ । बार्सिलोनाका हरेक सफलताका मुख्य आकर्षण रहँदै आएका मेस्सी बायर्नसँगको हारपछि सहयोगी विहिन देखिए । बायर्नविरुद्ध पनि मेस्सीले खेलको पहिलो हाफमा केहि अवसर सिर्जना गरेका थिए । तर अर्का फरवार्ड लुइस सुआरेजसँगै बार्सिलोनाको आक्रमण निरिह जस्तै देखियो ।

खेलमा बार्यनले एकपक्षिय दबाब सिर्जना गरेको थियो । कुनै कुनै बेला लाग्थ्यो बार्सिलोनाले खेल्न बिर्सिएको थियो । खेल पछिको ड्रेसिङ रुमा मेस्सी जुन अवस्थामा देखिए, त्यस तस्बिरले नै अवस्था बयान गरिरहेको थियो । उनीसँग भन्नका लागि केहि बाँकी रहेन ।

तस्बिरमा टोलीका गोलरक्षक मार्क आन्देर टेर स्टेगेनसँग दुरी कायम गरेर बसेका थिए । मेस्सी टोलाएर बेन्चमा बस्दा स्टेगन ढोकामा उभिएका थिए । सन् २००६/०७ यता पहिलो पटक मेस्सी उपाधि विहिन भएका छन् । यो हारको पिडा भुलाउन मेस्सी र उनको टोलीलाई केहि समय पक्कै लाग्नेछ । अझ पछिल्लो खेलको हारले असफलताको पिडालाई थप बल्झाएको छ ।

व्यक्तिगत रुपमा मेस्सीका लागि सिजन खराब भने रहेन । ला लिगामा सर्वाधिक गोलकर्ता बनेका मेस्सीले यस सिजन केहि कीर्तिमान पनि आफ्नो नाम गरे । तर टोलीका अन्य सदस्यले अपेक्षित प्रदर्शन गर्न नसक्दा बार्सिलोना उपाधिविहिन बन्यो । सिजनको सुरुवातमा एर्नेस्टो भालभेर्डे र त्यसपछि किके सेटिन दुवैसँग मेस्सीको राम्रो सम्बन्ध रहन सकेन ।

मेस्सीको भविष्य बार्सिलोनामा अनिश्चित रहेको चर्चा चलिरहँदा यस्तो प्रदर्शनले उनलाई थप सोच्न बाध्य बनाएको छ । उमेर ढल्कँदै गएका मेस्सी आफ्नो खेलाडी जीवन सफलतापूर्वक अन्त्य गर्न पक्कै चाहन्छन् । तर अब उनको यात्रा बार्सिलोनामै निरन्तर रहन्छ वा अन्यत्र हुन्छ, यसमा ठूलो प्रश्नचिन्ह खडा भएको छ ।