एजेन्सी – यो सिजनको युइएफए च्याम्पियन्स लिगको सेमिफाइनल समिकरण पुरा भएको छ । शनिबार राति भएको खेलमा फ्रेन्च क्लब सेमिफाइनलमा पुगेसँगै अन्तिम चारको समिकरण पुरा भएको हो ।

यसअघि फ्रेन्च क्लब पेरिस सेन्ट जर्मेन (पीएसजी), जर्मन क्लब आरबी लाइप्जिग र बायर्न म्युनिखले सेमिफाइनलमा स्थान बनाएका थिए । जर्मन क्लब बायर्न म्युनिखबाहेक अन्य तीन टोलीले अहिलेसम्म च्याम्पियन्स लिग जितेका छैनन् ।

यस संस्करणमा दुई फ्रेन्च क्लब र दुई जर्मन क्लब सेमिफाइनलमा पुग्न सफल भएको छ । अब सेमिफाइनलमा आरबी लाइप्जिग र पीएसजी तथा लियोन र बायर्न म्युनिखबीच प्रतिस्पर्धा हुनेछ ।
यसपटक एकै देशका दुई टोलीबीच फाइनलमा भिडन्त हुने सम्भावना समेत रहेको छ । दुई फरक देशका क्लबबीचको पनि सम्भावना छ ।

लाइप्जिगले स्पेनिस क्लब एट्लेटिको म्याड्रिडलाई २–१ ले तथा पीएसजीले इटालियन क्लब एटलान्टालाई २–१ ले नै हराएर अन्तिम चारमा स्थान बनाएको थियो । यस्तै अर्काे क्वाटरफाइनलमा जर्मन क्लब बायर्न म्युनिखले क्याटलान क्लब बार्सिलोनामाथि ८–२ को शानदार जित निकाल्दा फ्रेन्च क्लब लियोनले उपाधिको दावेदारको रुपमा रहेको इंग्लिस क्लब म्यानेचस्टर सिटीमाथि ३–१ को जित निकाल्दै बायर्नसँगको भेट पक्का गरेको हो ।

पहिलो सेमिफाइनल मंगलबार र दोस्रो सेमिफाइनल बुधबार हुनेछ । यसपटक कोरोना महामारीका कारण क्वाटरफाइनल सिंगल लेगको आधारमा सञ्चालन गरिएको थियो । सेमिफाइनल पनि एक लेगकै अवधारणामा हुनेछ ।

सबै खेलहरु मिनि टुर्नामेन्टको रुपमा पोर्चुगलको लिस्वनमा भइरहेको छ । फाइनल २३ अगस्टको राति हुनेछ ।