एजेन्सी – युरोपियन फुटबलको पावरहाउस मानिने स्पेनिस, इंग्लिस र इटालियन लिगका क्लबबिना ३० वर्षपछि यूईएफए च्याम्पियनस लिगको सेमिफाइनलमा समिकरण तयार भएको छ ।

शनिबार राति इंग्लिस क्लब म्यानचेस्टर सिटी फ्रान्सेली क्लब लियोनसँग क्वाटरफाइनलमा ३–१ ले पराजित भएसँगै ३० वर्षपछि स्पेन, इंग्ल्यान्ड र इटालियन क्लब सेमिफाइनल पुग्नबाट बन्चित भएका हुन् । त्यसअघि क्वाटरफाइनलमाा क्याटलान क्लब बार्सिलोना जर्मन क्लब बायर्न म्युनिखसँग ८–२ ले परासिजत भएको थियो ।

यसपटक जर्मनीका दुई र फ्रान्सका दुई क्लबले अन्तिम चारमा स्थान पक्का गरेका छन् । जर्मनीका आरबी लाइप्जिग र बायर्न म्युनिख तथा फ्रान्सको पेरिस सेन्ट जर्मेन (पीएसजी) र लियोन सेमिफाइनलमा प्रवेश गरेका छन् । अब दुवै राष्ट्रका टोलीले सेमिफाइनलमा एक अर्कासँग खेल्नेछन् ।

सेमिफाइनलमा लाइप्जिग र पीएसजी तथा लियोन र बायर्न म्युनिख भिड्ने भएकाले यसपटक फाइनलमा एकै राष्ट्रका दुई टोली हुने सम्भावना पनि छ । त्यस्तै सेमिफाइनलमा पुगेका टिममध्ये बायर्न म्युनिखबाहेक अन्य तीन टिमले अहिलेसम्म च्याम्पियन्स लिगको उपाधि जितेका छैनन् । बायर्नले अहिलेसम्म पाँचपटक च्याम्पियन्स लिग जितेको छ । बायर्नले पछिल्लोपटक २०१३ मा उपाधि जितेको थियो ।

सन् १९९०–९१ सिजनमा सर्वियन क्लब रेड स्टार बेलग्रेड, जर्मन क्लब बायर्न म्युनिख, फ्रान्सेली क्लब मार्से र रसियन क्लब स्पार्टक मस्कोले अन्तिम चारमा स्थान बनाएको थिए । त्यसबेला रेडस्टार बेलग्रेडले मार्सेलाई पेनाल्टी सुटआउटमा ५–३ ले पराजित गर्दै उपाधि जितेको थियो ।

प्रतियोगिताको सेमिफाइनल खेल मंगलबार र बुधबार हुनेछ । यसपटक कोरोना महामारीका कारण क्वाटरफाइनल सिंगल लेगको आधारमा सञ्चालन गरिएको थियो । सेमिफाइनल पनि एक लेगकै अवधारणामा हुनेछ । खेलहरु मिनि टुर्नामेन्टको रुपमा पोर्चुगलको लिस्वनमा भइरहेको छ । फाइनल २३ अगस्टको राति हुनेछ ।