एजेन्सी – यूईएफए युरोपा लिगको पहिलो सेमिफाइनलमा उपाधिका दुई दाबेदार स्पेनिस क्लब सेभिल्ला र इंग्लिस क्लब म्यानचेस्टर युनाइटेडबीच प्रतिस्पर्धा हुँदैछ । खेल जर्मनीमा नेपाली समयअनुसार राति १२ः४५ बजे हुनेछ ।

फाइनल प्रवेशका निम्ति दुई टोलीबीचको खेल निकै रोमाञ्चक र प्रतिस्पर्धात्मक हुने अनुमान गरिएको छ । युनाइटेडसँग अपराजित रहेको सेभिल्ला सोही लयलाई निरन्तरता दिँदै फाइनल पुग्ने दाँउमा हुनेछ । सेभिल्लो प्रिमियर लिग क्लब वल्भ्सलाई १–० ले पराजित गर्दै सेमिफाइनलमा स्थान पक्का गरेको थियो ।

सेभिल्लाका लागि लुकास ओकाम्पस नै मुख्य हतियार हुनेछन् । उनले नै वल्भ्सविरुद्धको खेलमा निर्णायक गोल गरेका थिए । युसेफ इन न्यासरी, इभर बनेगा, लुक डि जोङ, मुनिर इल हाडाडी, सर्जियो रिगुइलन, डिएगो कार्लाेस, जेसस नाभास र गोलरक्षक यासनि बोउनोउ हुनेछन् ।

यता, पछिल्लो समय लगतार उच्च प्रदर्शन गरिरहेको म्यानचेस्टर युनाइटेड सेभिल्लालाई पराजित गर्दै फाइनल पुग्ने दाउमा हुनेछ । एफए कपको सेमिफाइनलमा चेल्सीसँग ३–१ ले पराजित भएयता, युनाइटेड पछिल्लो चार खेलमा अपराजित छ ।

युनाइटेडले डेनिस क्लब एफसी कोपनहेगनलाई अतिरिक्त समयमा १–० ले पराजित गर्दै सेमिफाइनलमा स्थान बनाएको हो । युनाइटेडका लागि पोर्चुगिज ब्रुनो फर्नान्डेज नै टोलीका लागि मुख्य खेलाडी हुनेछन्। एन्थोनी मार्सियल, मार्कस रासफोर्ड, मेसन ग्रीनवुड, पल पोग्वा, ह्यारी मगाएर, आरोन वान विशाकाजस्ता स्तरीय खेलाडीको युनाइटेडलाई साथ छ ।

यि दुई टोली हालसम्म तीनपटक आमने–सामने भएका छन् । जसमा दुई खेल सेभिल्लाले आफ्नो पक्षम पार्दा एक खेल गोलरहित बराबरीमा टुंगिएको छ । युनाइटेड सेभिल्लामाथि पहिलोपटक जित निकाल्न चाहन्छ भने सेभिल्ला युनाइटेडसँगको अपराजित यात्रालाई निरन्तरता दिने दाउमा हुनेछ ।

पछिल्लोपटक यि दुई टोली २०१८ को मार्चमा च्याम्पियन्स लिगको प्रि–क्वाटरफाइनलमा खेलेका थिए । पहिलो लेग गोलरहित बराबरीमा सकिएपनि दोस्रो लेगमा सेभिल्लाले २–१ को जित निकालेको थियो । उक्त खेलमा गोल गरेका दुवै खेलाडी टोलीमा छैनन् । उक्त खेलमा युनाइटेडका लागि गोल गरेका रोमेलु लुकाकु इटालियन क्लब इन्टर मिलानमा तथा सेभिल्लाका लागि दुवै गोल गरेका विसाम विन यडर फ्रेन्च क्लब मोनाको पुगेका छन् ।

यि दुई बीचको विजेताले उपाधिका लागि इन्टर मिलान र साख्तर डोनेस्कबीचकबो विजेतासँग खेल्नेछ ।