इंग्लिस क्लब म्यानचेस्टर सिटीलाई पछिल्लो समय यूईएफए च्याम्पियन्स लिगमा उपाधिको दाबेदार टोलीको रुपमा लिइन्छ । अझ यसपटक प्रि-क्वाटरफाइनल चरणमा रियल म्याड्रिडलाई पराजित गरेपछि त टोलीले बलियो दाबेदारी प्रस्तुत गर्ने अपेक्षा गरिएको थियो । तर सिटीको उपाधि जित्ने सपना फेरिपनि क्वाटरफाइनल चरणमा नै तुहियो ।

फ्रान्सेली क्लब लियोनविरुद्ध खेल्नुअघि कमैले सोचेका थिए, म्यानचेस्टर सिटी पराजित हुन्छ भनेर । अझ ३-१ को स्कोरमा सिटीले घर फर्कनुपर्छ भने आँकलन स्वयं लियोनले पनि लगाएको थिएन । लियोनका प्रशिक्षक रुडी गार्सियाले खेलअघि भएको पत्रकार सम्मेलनमा सिटीविरुद्ध एक लेगको मात्र खेल भएकाले सुरुवाती ११ मात्र होइन, वैकल्पिक खेलाडी समेत १६ खेलाडीकै प्रदर्शन महत्त्वपूर्ण हुन्छ ।

भयो पनि त्यस्तै, लियोनलाई जितसम्म डोर्याउन वैकल्पिक खेलाडी मौसा डेम्बेलेले दोस्रो हाफमा दुई गोल गरे । दुवै गोलमा उनले विपक्षी टोलीको गल्तिको फाइदा उठाए । मैदान छिरेको ४ मिनेटमा नै उनले अफसाइड ट्रयाप बिट गर्दै गोल गरेका थिए । दोस्रो गोलमा पनि गोलरक्षकले फुत्काएको बलमा उनी छरितो रुपमा बलसम्म पुगे र गोल गरे ।

डेम्बेलेको दोस्रो गोलअघि भने म्यानचेस्टर सिटीका रहिम स्टर्लिङको गम्भीर गल्ति सिटीको हारमा निर्णायक नै बन्न पुग्यो । ८६ औं मिनेटमा ग्याब्रिएल जेससले पेनाल्टी क्षेत्रभित्र डिफेन्डरको दबाब थेग्दै ६ यार्ड बक्सभित्र क्रस गरे । गोलरक्षक एन्थोनी लोपेस र तीनै सेन्टर डिफेन्डर उक्त क्रसमा बिट भए । स्टर्लिङ फार पोस्टमा एक्लै थिए र उनको सामुन्ने गोलपोस्ट खालि थियो । उनको सामान्य टचले पनि बल गोल हुन्थ्यो । तर स्टर्लिङले गोल गर्नभन्दा पोस्टभन्दा बाहिर पठाउन कठिन स्थितिमा बललाई पोस्टभन्दा माथि प्रहार गरे ।

लगभग पक्का नै देखिएको उक्त गोल चुक्दा सिटीका खेलाडीसँगै लियोनका खेलाडी पनि अचम्मित भए । गोलकिकका लागि आएको बल समात्दै स्टर्लिङ एकछिन मैदानमा ढले । उनी आफैंलाई बल गोल भएन भन्ने विश्वास लागिरहेको थिएन । लोपेसले केहि समय लिएर गोलकिक प्रहार गरे ।

त्यसै गोलकिक प्रहारबाट अगाडी बढेको मुभमा हौसेम औआरले सिटीको पोस्टमा प्रहार गरे । निकै सामान्य उक्त प्रहारलाई एडरसनले नियन्त्रणमा लिन सकेनन् । मौकाको फाइदा उठाउँदै हतारमा अगाडी बढेका डेम्बेलेले बल प्रहार गरे । उनको प्रहार राम्रोसँग नलागेपनि पोजिसनमा फर्कन नसकेका एडरसनले बचाउन सकेनन् र लियोन ३-१ ले विजयी रहयो ।

त्यसो त लियोनले गरेको तीनै गोलमा प्रत्यक्ष रुपमा सिटीको गोलरक्षक र डिफेन्सबीच असमझदारी झल्कन्थ्यो । पहिलो गोलमा एरिक गार्सियाले ट्याकल गरेको बललाई म्याक्स्वेल कर्नेटले पेनाल्टी क्षेत्र बाहिरबाट गोलको दिशा दिए । उक्त गोलमा पनि गोलरक्षक एडरसन पोजिसन छोडेर अगाडी बढेका थिए ।

दोस्रो हाफमा केभिन डे ब्रुएनले स्टर्लिङको पासमा गोल गर्दै खेल बराबरीमा ल्याए । तर त्यो खुसी लामो समय टिक्न सकेन । १० मिनेटपछि नै लियोनले खेलमा अग्रता पुन: स्थापना गर्यो । लियोनको दोस्रो गोल पनि डिफेन्सले अफसाइड माग गर्दै बल छोडेपछि सम्भव भएको थियो ।

औआरको पासमा तोको एकाम्बी अफसाइड थिए, तर उनले बल नछोई अगाडी जान दिए । एकाम्बीको पछाडी रहेका डेम्बेले लापोर्टको मार्कीङ तोड्दै बल लखेट्न थाले । रेफ्रीको सिठी नबजेपनि सिटीका खेलाडी रोकिएर अपिल गर्न थाले । डेम्बेले भने अगाडी बढेर पोस्टमा प्रहार गरे । अगाडी बढेका गोलरक्षक एडरसनले बल बचाउने प्रयास गरेपनि सफल हुन सकेनन् ।

समग्रमा सिटीले लियोनविरुद्ध अपेक्षित प्रदर्शन गर्न सकेन । डिफेन्समा प्रत्यक्ष गल्ति देखिएपनि आक्रमणमा भने सिटी केहि फितलो देखियो । पछिल्लो खेलबाट फिल फोडेनलाई निकालेर डिफेन्डर गार्सियालाई खेलाउनुले पनि केहि प्रश्न पक्कै उब्जाएको छ । डे ब्रुएनकै भरमा अवसर सिर्जना गर्न उत्रेको सिटीको प्रयासमा गोलरक्षक लोपेस पनि बाधक बनिरहे । उनले सिटीको आधा दर्जन प्रयास विफल पारे ।

सिटीको प्रशिक्षण जिम्मेवारीमा गुआर्डीओलाको यो चौथो सिजन हो । हालसम्म गुआर्डीओलाले क्वाटरफाइनलबाट टोलीलाई अगाडी बढाउन सकेका छैनन् । गत सिजन पनि टोटेनहमसँग सिटी अन्तिम समयमा पराजित हुनुपरेको थियो । रहिम स्टर्लिङले दोस्रो लेगको इन्ज्युरी समयमा गोल गरेपछि सिटी अगाडी बढ्ने देखिएको थियो । तर भिडियो असिस्टेन्ट रेफ्री (भीएआर) ले उक्त गोललाई मान्यता नदिएपछि टोटेनहम अगाडी बढेको थियो ।

शनिबार पनि लियोनविरुद्ध स्टर्लिङको गल्ति नै खेलमा निर्णायक बन्न पुग्यो । त्यसअघि पनि खेलमा स्टर्लिङले पाएको अवसरहरु सदुपयोग गर्न सकेका थिएनन् । जारी सिजन टोलीका लागि लिगमा २० र च्याम्पियन्स लिगमा ६ गोल गर्दै सर्वाधिक गोलकर्ता रहेका स्टर्लिङले मुख्य खेलमा भने प्रदर्शन गर्न सकेनन् । अर्का फरवार्ड जेससको प्रदर्शन पनि औसत मात्र रहयो ।

खेलपछि प्रशिक्षक पेप गुआर्डीओलाले यस प्रतियोगितामा गल्तिको कुनै अवसर नहुने प्रष्ट पारे । उनले स्टर्लिङको गल्तिलाई इंगित गर्दै त्यस स्तरको गल्ति गरेर अगाडी बढ्न नसकिने बताए । ‘ हामी च्याम्पियन्स लिग खेलिरहेका छौं । हामी गोलमा चुक्छौँ र पछि त्यसैको नतिजामा गोल खान्छौं भने अघि बढ्न सक्दैनौं । हामी फेरी पनि यस चरण पार गर्ने प्रयास गर्ने नै छौँ,’ उनले भने ।

उपाधि दाबेदार मानिएको सिटी घरेलु प्रतियोगितामा सफल भएपनि युरोपमा भने चुक्दै आएको छ । समूह चरणमा प्रभावशाली प्रदर्शन गर्ने सिटी नकआउट चरणमा भने झिनो अन्तरले पछि पर्दै आएको छ । सिटीकै अन्य प्रशिक्षकको तुलानामा गुआर्डीओलाले थप केहि हासिल गर्न सकेका छैनन् । यसले पनि उनको भविष्य क्लबमा रहनेबारे प्रश्न उब्जाएको छ ।