एजेन्सी – यो सिजनको ‘गोल्डेन ब्वाइ’ अवार्ड मनोनयन अन्तर्गत स्पेनिस महारथी रियल म्याड्रिडका चार युवा खेलाडीले अन्तिम ६० को सुचीमा स्थान बनाएका छन् ।

आइतबार १ सय खेलाडीबाट ६० जनाको मनोनयन सार्वजनिक गर्दा रियलका चार युवा खेलाडी मनोनयनमा पर्न सफल भएका हुन् । रियलका भिनिसियस जुनियर, रोड्रिगो, ताकेफुसा कुवो र रेनिएर मनोनयनमा पर्न सफल भएका हुन् ।

अघिल्लो सिजन मालोर्काबाट लोनमा खेलेका कुवो नयाँ सिजनको लागि लोनमा भिल्लारियल पुगेका छन् । रेनिएर आउँदो सिजन लोनमा अन्यत्र क्लब जाने तयारीमा छन् । रियलसँगै क्याटलान क्लब बार्सिलोनाका अन्सु फाती र पेड्री तथा एट्लेटिको म्याड्रिडका निहुवेन पेरेज पनि मनोनयनमा परेका छन् ।

भिनिसियस र रोड्रिगो अघिल्लो वर्षपनि अन्तिम तीनसम्म पुगेका थिए । भोटिङको आधारमा स्पेनिस क्लब एट्लेटिको म्याड्रिडका पोर्चुगिज फरवार्ड जोआओ फेलिक्सले भिनिसियस र रोड्रिगोलाई पछि पार्दै अवार्ड हात पारेका थिए ।

जर्मन क्लब बोरुसिया डर्टमुन्डका एर्लिङ ब्राउट हालान्ड र बायर्न म्युनिखका अलफोन्सो डाभिस पनि यसपटक मनोनयनमा परेका छन् । हालान्डलाई मुख्य दावेदारको रुपमा हेरिएको छ ।

टुट्टो स्पोर्ट्सले हरेक वर्ष युवा खेलाडीलाई लक्षित गर्दै यो अवार्डको आयोजना गर्ने गर्दछ । टुट्टोले गत जुनमा १०० जनालाई मनोनयन गरेको थियो ।