एजेन्सी – म्यानचेस्टर सिटीका मिडफिल्डर केभिन डे ब्रुएन इंग्लिस प्रिमियर लिगको सिजन २०१९-२० को उत्कृष्ट खेलाडी घोषित भएका छन् ।

डे ब्रुएनले लिभरपुलक साडियो माने, जोर्डन हेन्डरसन र ट्रेन्ट एलेक्जेन्डर आर्नोल्डलाई पछि पार्दै उपाधि जितेका हुन् । उपाधिको दाबेदारीमा बर्नालीका गोलरक्षक निक पोप, साउथह्याम्पटन फरवार्ड ड्यानी इन्ग्स र गोल्डेन बुट विजेता लेस्टर सिटीका जेमी भार्डी समेत रहेका थिए । सिटीले लिग उपाधि रक्षा गर्न नसकेपनि उपविजेता बन्दा डे ब्रुएनको प्रदर्शन उत्कृष्ट रहेको थियो ।

डे ब्रुएनले प्रिमियर लिग इतिहासकै कीर्तिमान बराबरी गर्ने क्रममा यस सिजन २० असिस्ट प्रदान गरेका थिए । यसअघि सन् २००३ मा आर्सनलका थिएरी हेनरीले यो उपलब्धि हासिल गरेका थिए । डे ब्रुएनले सिटीका लागि १३ गोल समेत गरेका थिए । सिटीले सिजनभर १ सय गोलको आँकडा पार गर्दा डे ब्रुएन आफैं ३३ गोलमा प्रत्यक्ष संलग्न थिए ।

यसअघि लिग च्याम्पियन लिभरपुलका प्रशिक्षक योर्गेन क्लोप सिजनको उत्कृष्ट प्रशिक्षक घोषित भएका थिए । लिभरपुलकै डिफेन्डर ट्रेन्ट एलेक्जेन्डर आर्नोल्ड भने लिगको उत्कृष्ट युवा खेलाडी घोषित भए । लिभरपुलले उपाधि जित्ने क्रममा ३८ खेल खेल्दै ९९ अंक जोडेको थियो । एक समय लिग अवधिभर नै अपराजित रहने संकेत दिएको लिभरपुलले वाटफर्डसँग हार बेहोरेपछि केहि लय गुमाएको थियो ।

टोटेनहम हट्सपरका फरवार्ड ह्युङ मिन सनले भने सिजनको उत्कृष्ट गोलको उपाधि जिते । उनले बर्नालीविरुद्ध गरेको गोल उत्कृष्ट गोलको रुपमा छनोट भएको थियो । सनले आफ्नै हाफबाट एक्लै कुदाएर ५ डिफेन्डरलाई बिट गर्दै गरेको गोल उत्कृष्ट घोषित भएको थियो ।