एजेन्सी – युइएफए युरोपा लिगको दोस्रो सेमिफाइनलमा आज राति इटालियन क्लब इन्टर मिलान र युक्रेनी क्लब साख्तर डोनेक्सबीच प्रतिस्पर्धा हुँदैछ ।

खेल जर्मनीमा नेपाली समयअनुसार राति १२ः४५ बजेपछि सुरु हुनेछ । दुई टोली पहिलोपटक आमने सामने हुन लागेका हुन् । दुवै टिम जित निकाल्दै फाइनल पुग्ने लक्ष्यमा हुनेछन् । विजेताले फाइनलमा स्पेनिस क्लब सेभिल्लाको सामना गर्नेछ । सेभिल्लाले आइतबार राति इंग्लिस क्लब म्यानचेस्टर युनाइटेडलाई २–१ ले पराजित गर्दै फाइनलमा स्थान पक्का गरिसकेको छ ।

पछिल्लो समय लयमा रहेको इन्टर मिलान साख्तरलाई हराउदै फाइनल पुग्ने दाउमा हुनेछ । इन्टरका लागि रोमेलु लुकाकु नै टोलीको मुख्य हतियार हुनेछन् । लाउटारो मार्टिनेज, एलेक्सिस सान्चेज, डिएगो गोडिन, एस्ले योङ र ड्यानिलो डि एम्ब्रुसोजस्ता खेलाडीको पनि इन्टरलाई साथ छ ।
इन्टर पछिल्लो १० खेलमा अपराजित छ । इन्टर पछिल्लोपटक ५ जुनमा बोलोग्नासँग २–१ ले पराजित भएको थियो ।

यता, युक्रेनी साख्तर पनि इन्टरलाई स्तब्ध पार्दै उपाधिनजिक पुग्न चहान्छ । स्वीस क्लब एफसी बसेलको चुनौती सहजै पन्छाएर अघि बढेको साख्तर सोही लयलाई निरन्तरता दिने दउमा हुनेछ । पछिल्लो आठ खेलमा अपराजित साख्तरका लागि जुनियर मोराइस, टाएसन, मार्लाेस र डुडु जस्ता खेलाडीको साथ छ ।

साख्तर दोस्रोपटक युरोपा लिगको फाइनल पुग्न चाहन्छ । यसअघि साख्तरले २००९ मा उपाधि जितेको थियो । तीन पटकको च्याम्पियन इन्टर पाँचौपटक फाइनल पुग्ने दाउमा हुनेछ । इन्टर चारपटक फाइनलमा प्रवेश गर्दा तीनपटक (१९९१, १९९४ र १९९८) मा च्याम्पियन बन्दा १९९७ मा उपविजेता बनेको थियो ।