एजेन्सी – बार्सिलोनाको सफलता होस् वा सफलता दुवैमा लियोन मेस्सीको चर्चा अनिवार्य रुपमा हुने गर्दछ । बार्सिलोनामा सबै खाले सफलता प्राप्त गरिसकेका मेस्सीको क्लबमा भविष्यलाई लिएर चर्चा पुनः सुरु भएको छ ।

च्याम्पियन्स लिग क्वार्टरफाइनलमा बायर्न म्युनिखसँग ८–२ को लज्जास्पद हार भएपछि क्याम्प नोउमा उनको भविष्य के हुने भन्ने चर्चा सुरु भएको छ । यद्दपी उनी आफैले पनि यो विषयमा मुख खोलेका छैनन् ।

किके स्टेन प्रशिक्षकबाट बर्खास्त भइसकेका छन् । त्यस्तो टोलीको प्राविधिक विभागमा पनि व्यापक परिवर्तनको अपेक्षा गरिएको छ । तर, अध्यक्ष जोसेप मारिया बोर्टमेउले तत्काल राजीनाम गर्ने छैनन् । क्लबको निर्वाचन भने छिट्टै हुने सम्भावना रहेको छ । क्लबका रक्षक जेरार्ड पिकेले टोली पूर्न निर्माणका लागि आफुले छाड्नुपर्ने अवस्था आएपनि त्यसका लागि तयार रहेको बताएर दबाब दिएका छन् ।

खेलमा हार जित स्वभाविक हो । तर, लिस्बनमा बार्यनसँग बार्सिलोनाको त्यो हार कसैको कल्पनामा थिएन । त्यो खेलपछि मेस्सी चुपचाप रहेका छन् । रोमा र लिभरपुलसँग विगतमा बार्सिलोना हारेको थियो, तर यस्तो लज्जास्पद हार मेस्सीले बेहोर्नुपरेको थिएन ।

त्यो हारले धेरैलाई झट्का लागेको छ । मेस्सी आफैं पनि त्यो हारबाट निकै दिक्क रहेको बताइएको छ । यद्दपी बार्सिलोनामा उनको भविष्यलाई लिएर केहि महिना यताबाटै चर्चा सुरु भएको थियो । ओसासुनासँगको खेलपछि उनले व्यक्त गरेको असन्तुष्टीले पनि उनी लामो समय बार्सिलोनामा नरहन सक्ने अड्कल काटिएको थियो ।

पछिल्ले केहि समययता बार्सिलोनाले भित्राएका प्रशिक्षकको विषयमा खेलाडीहरु सन्तुष्ट रहन नसकेको बताइन्छ । स्टेन हुन् वा त्यअघिका इर्नेस्टो भाल्र्भेडे प्रति खेलाडी खासै कारात्मक नरहेको बताइएको थियो ।

मेस्सीले बार्सिलानो बोर्डको निर्णय पर्खिरहेको अनुमान गरिएको छ । अहिले टोलीमा रहेको संकटर्लाइ बोर्डले केसरी कम गर्ने प्रयास गर्नेछ त्यसपछि मात्र मेस्सीले आफ्नो धारणा सार्वजनिक गर्न सक्नेछन् । उनी आफै पनि बार्सिलोनासँगको नयाँ सम्झौताका लागि तयार नरहेको चर्चा पनि सँगै चलिरहेको छ । मेस्सीको क्लबसँगको सम्झौता सन् २०२१ को जुनसम्म छ । अहिले थप सम्झौताका लागि उनी इच्छुक नरहेको बताइएको छ ।

मेस्सीको भविष्यलाई लिएर तीन अब तीन विकल्प अगाडी रहेका छन् । पहिलो उनले सम्झौताको अन्त्य गर्दै उनले नयाँ सिजनमा नयाँ क्लबको बाटो रोज्न सक्नेछन् । तर, क्लबका अध्यक्ष बार्टोमेउले मेस्सीलाई रोक्नका लागि सबै खाले विकल्प प्रयोग गर्नेछन् । यदि उनले अर्को क्लबको बाटो रोजे भने त्यो बार्सिलोनाका लागि ठूलो घाटा हुने अध्यक्षलगायत सबैलाई थाहा छ ।

मेस्सी आफैं पनि टोलीको प्रदर्शनबाट सन्तुष्ट हुन सकेका छैनन् । पछिल्लो पाँच वर्षमा टोलीले च्याम्पियन्स लिग जित्न सकेको छैन । झन् यो वर्ष टोली उपाधिविहिन भएको छ । मेस्सीको खेल जीवनका सबै भन्दा ठूलो प्रतिस्पर्धीका रुपमा रहेका क्रिस्टियानो रोनाल्डोले अलग अलग तीन देशका लिगमा उच्च प्रदर्शन गरेका छन् । त्यस्तो अनुभव मेस्सीसँग छैन । उनको सबै सफलता बार्सिलोनामै सिमत छ ।

क्लबमा अहिले जे भइरहेको छ त्यो सन्तोषजनक नरहेको मेस्सी पनि मान्छन् । प्राविधिक विभागमा ठूलै परिवर्तन आवश्यक रहेको उनको मत छ । आफ्नो अनुरोधमा पनि नेयमारलाई पुनः क्लबमा फर्काउन नसक्दा मेस्सी क्लबसँग खुसी छैनन् ।

अर्को विकल्प अहिलेको सम्झौता रहेसम्म क्लबमा रहने । त्यसको अर्थ उनी अब नयाँ सम्झौता गर्ने छैनन् । त्यसपछि उनी जुन सुकै क्लबमा जानका लागि खुला हुनेछन् । त्यो पनि बार्सिलोनाका लागि भने सहज अवस्था होइन । बार्सिलोना जुन सुकै अवस्थामा पनि मेस्सीलाई गुमाउन चाहँदैन । त्यसमा के गर्ने भन्ने निर्णय मेस्सी आफैले लिनु पर्नेछ ।

तेस्रो विकल्प क्लबसँग नयाँ सम्झौता गर्ने । विगतमा पनि पटक पटक मेस्सीले क्लब छाड्न सक्ने चर्चाका बीच नयाँ सम्झौता गरेका थिए । यसपटक पनि त्यस्तै हुनेमा क्लब आशावादी पनि हुन सक्दछ । तर मेस्सीले नयाँ सम्झौता गरेकै खण्डमा पनि लामो समय गर्ने छैनन् भन्ने अनुमान गरिएको छ ।

अहिलेको कठीन अवस्थामा भने मेस्सीले अझै केहि समय धर्यता राख्ने सम्भावना छ । यति बुझ्न कठीन भने छैन, उनी तत्काल क्लबसँग नयाँ सम्झौताको पक्षमा भने छैनन् । क्लबले अब लिने कदम मेस्सीसँगै क्लबकै भविष्यका लागि पनि महत्त्वपूर्ण छ ।