एजेन्सी – फरवार्डद्धय लोउटारो मार्टिनेज र रोमेलु लुकाकु चम्कदा इटालियन क्लब इन्टर मिलान युइएफए युरोपा लिगको फाइनलमा प्रवेश गरेको छ ।

जर्मनीमा सोमबार राति भएको खेलमा युक्रेनी क्लब साख्तर डोनेक्समाथि ५–० को सानदार जित निकाल्दै इन्टर मिलान उपाधि नजिक पुगेको हो । अब इन्टरले उपाधिको लागि स्पेनिस क्लब सेभिल्लाको सामना गर्नेछ । फाइनलमा शुक्रबार राति हुनेछ ।

पहिलो हाफमा १–० को अग्रता लिएको इन्टरले दोस्रो हाफमा चार गोल थप्न सफल भएको थियो । एक गोल ड्यानियल डि एम्ब्रुसियोको नाममा रह्यो । खेलको १९औं मिनेटमा अर्जेन्टिनी फरवार्ड लोउटारो मार्टिनेजले गोल गर्दै इन्टरलाई शुरुवाती अग्रता दिलाएका थिए । निकोलो बरेल्लाको क्रसमा मार्टिनेजले हेडरमार्फत गोल गरेका थिए ।

६२औं मिनेटमा मानभियान्कोको क्रसमा जुनियर मोराइसको हेडर पोस्टबाट थोरै बाहिरिदा साख्तर बारबरीबाट चुकेको थियो । त्यसको दुई मिनेटपछि ड्यानिलो डि एम्ब्रुसियोले गोल गर्दै इन्टर मिलानको अग्रता दोब्बर पारे । मार्सेलो ब्रोजोभिकको कर्नरलाई एम्ब्रुसियोले गोलमा परिणत गरेका थिए ।

७४औं मिनेटमा रोमेलु लुकाकुको पासमा मार्टिनेजले व्यक्तिगत दोस्रो गोल गर्दै इन्टरलाई ३–० ले अघि बढाए । त्यसपछिको दुई गोल लुकाकुको नाममा रह्यो । उनले ६ मिनेटको अन्तरमा दुई गोल गर्दै इन्टरलाई फराकिलो जित दिलाए ।

७८औं मिनेटमा मार्टिनेजको पासमा लुकाकुले गोल गर्दै इन्टरलाई ४–० ले अघि बढाए । ८३औं मिनेटमा लुकाकुले स्टेफनको पासमा व्यक्तिगत दोस्रो गोल गर्दै इन्टरलाई ५–० को फराकिलो जितसहित फाइनलका पुर्‍याए । बल पोजेसनमा पकड बनाएपनि साख्तरले इन्टर मिलानको बलियो रक्षापङ्ति तोड्न नसक्दा फराकिलो हार भोग्दै सेमिफाइनलबाट बाहिरिन बाध्य बन्यो ।

तीन पटकको च्याम्पियन इन्टर मिलान पाँचौपटक युरोपा लिगको फाइनलमा पुग्न सफल भएको हो । इन्टर १९९१, १९९४ र १९९८ मा च्याम्पियन बन्दा १९९७ मा उपविजेता बनेको थियो ।