एजेन्सी – स्पेनिस क्लब रियल म्याड्रिडका ब्राजिली युवा स्टार रेनिएर जर्मन क्लब बोरुसिया डर्टमुन्डमा अनुबन्धित हुने भएका छन् । डर्टमुन्डले १८ वर्षीय युवा मिडफिल्डरलाई दुई वर्षको लागि लोनमा अनुबन्ध गर्न लागेको हो ।

रियलले रेनिएरको क्षमता देखेर नै गत जनवरीमा २५ मिलियन पाउन्डमा गत जनवरीमा सन् २०२७ सम्मको लागि अनुबन्ध गरेको थियो । उनले फ्लामेङ्गोको सिनियर टोलीबाट ८ खेलमा ६ गोल गर्दै युरोपका ठुला क्लबको नजरमा परेका थिए । तर, रियलमा तत्कालै पहिलो रोजाईमा पर्ने सम्भावना न्युन रहेपछि रियलले रेनिएरको खेलको थप क्षमता विस्तारको लागि लोनमा पठाउने निर्णय गरेको थियो ।

रेनिएरको लागि डर्टमुन्डसँगै बायर लिभरकुसन, रियल सोसिडाड र रियल भालाडोलिडले पनि चासो देखाएका थिए । यस्तै यसअघि नै युरोप बाहिरका तीन खेलाडी रहिसकेका कारण पनि रेनिएरलाई रियलले बाहिर पठाउन निर्णयमा पुगेको हो । रियलमा तीन ब्राजिली खेलाडी भिनिसियस जुनियर, रोड्रिगो र एडर मिलिटाओ युरोप बाहिरको खेलाडीको रुपमा रहेका छन् ।

रेनिएर जनवरी यता, रियलको रिजर्भ टिममा रहँदा कोरोनापछि पहिलोपटक सिनियर टोलीको प्रशिक्षण क्याम्पमा परेका थिए । डर्टमुन्डले यसअघि पनि रियलका अचरफ हाकिमीलाई लोनमा अनुबन्ध गरेको थियो । उनले लोनमा दुई वर्षको पुरा गर्दै यसै सिजन इटालियन क्लब इन्टर मिलानमा आबद्ध भएका छन् ।

रेनिएर डर्टमुन्डमा आबद्ध भएसँगै उनी युवा स्टारहरु एर्लिङ ब्राउट हालान्ड, जाडोन सान्चो र जुडे बेलिङहम जस्ता खेलाडीसँग खेल्ने भएका छन् । डर्टमुन्डका प्रशिक्षक लुसियन फाब्रेले रेनिएर क्षमतावान् खेलाडी रहेकाले नम्वर ९ र आक्रामक मिडफिल्डमा रहेर पनि गोल गर्न सक्ने बताए ।