एजेन्सी – यूईएफए च्याम्पियन्स लिगअन्तर्गत पहिलो सेमिफाइनलमा आज राति जर्मन क्लब आरबी लाइप्जिग र फ्रेन्च क्लब पेरिस सेन्ट जर्मेन (पीएसजी) बीच प्रतिस्पर्धा हुँदैछ ।

खेल पोर्चुगलको लिस्वनमा नेपाली समयअनुसार राति १२ः४५ बजेपछि शुरु हुदैछ । दुवै टोली पहिलोपटक फाइनल पुग्ने दाउमा छन् । पीएसजी २५ वर्षपछि सेमिफाइनलमा प्रवेश गरेको हो भने लाइप्जिग क्लब इतिहासमै पहिलोपटक अन्तिम चारमा पुग्न सफल भएको छ ।

फ्रान्समा घरेलु फुटबलको तीन उपाधि जितेको पीएसजी जर्मन प्रतिद्वन्द्वीलाई पाखा लगाउँदै पहिलोपटक फाइनल पुग्ने प्रयासमा हुनेछ । सन् १९९४–९५ को सिजमा पीएसजी सेमिफाइनलमा इटालियन प्रतिद्वन्द्वी एसी मिलानसँग समग्रमा ३–० ले पराजित हुँदै फाइनल पुग्न असमर्थ रहेको थियो । पहिलो लेगमा १–० ले पछि परेको पीएसजी दोस्रो लेगमा २–० ले पराजित भएको थियो । यसपटक पीएसजी त्यो गल्ती दोहोर्‍याउन चाहदैन ।

विश्व फुटबलका दुई स्टार खेलाडीहरु ब्राजिली नेयमार र फ्रेन्च युवा फरवार्ड केलियन एमबप्पेको साथ पाएको पीएसजी उच्च मनोबलका साथै मैदान उत्रनेछ । पछिल्ला खेलमा नेयमारले उच्च प्रदर्शन गरिरहँदा एमबाप्पेले इटालियन क्लब एटलान्टाविरुद्धको खेलबाट चोटबाट पूनरागमन गरेका थिए । त्यसैले नेयमार र एमबाप्पे नै टोलीका लागि मुख्य हतियार हुनेछन् ।

पछिल्लो खेल प्रतिबन्धका कारण गुमाएका एन्जल डि मारियाले लाइप्जिगविरुद्ध सुरुवात गर्ने सम्हावाना छ । माउरो इकाडी, मार्किन्योस, थियागो सिल्भा, थिलो केरहर, जुवान बर्नाट टोलीमा रहँदा पहिलो रोजाईका गोलरक्षक केलर नाभासले चोटका कारण लाइप्जिगविरुद्धको खेल गुमाउने छ । सर्जियो रिकोले पीएसजीको पोस्ट सम्हाल्नेछन् । नाभासको अभाव टोलीलाई हुन सक्नेछ ।

यता, छोटो समयमै उच्च नतिजा निकालिरहेको आरबी लाइप्जिग पनि पीएसजीलाई स्तब्ध पार्दै पहिलोपटक फाइनल प्रवेश गर्दै इतिहास बनाउन चहान्छ । लाइप्जिगकका लागि युसुफ पउलसेन, ड्यानिय ओल्मो, क्रिस्टोफेर एनकुन्कु, मार्सेल सवित्जर, एन्जेलिनो र गोलरक्षक पिटर गुलाक्सी रहनेछन् । लाइप्जिग नेयमार र एमबाप्पेलाई रोक्दै गोलरक्षक केलर नाभास नभएको फाइदा उठाउने दाँउमा हुनेछ ।

यि दुई टोली दोस्रोपटक आमने–सामने हुन लागेको हुन् । यसअघि सन् २०१४ मा भएको मैत्रीपूर्ण खेलमा लाइप्जिग ४–२ ले विजयी भएको थियो । त्यसबेला एक गोल गरेका युसुफ पउलसेन अहिले पनि लाइप्जिगको टोलीमा छन् । पीएसजी पछिल्लो ११ खेलमा अपराजित रहेको छ । लाइप्जिगले पछिल्ला तीनमध्ये दुई खेलमा जित तथा एक खेलमा हारको नतिजा निकालेको छ ।

यस खेलमा विजयी हुने टोलीले उपाधिका लागि आइतबार राति लियोन र बायर्न म्युनिखबीचको विजेतासँग प्रतिस्पर्धा गर्नेछ । लियोन र बायर्नबीचको खेल भोलि राति हुनेछ ।