एजेन्सी – फ्रान्सेली च्याम्पियन पेरिस सेन्ट जर्मेन (पीएसजी) क्लब इतिहासमै पहिलो पटक यूईएफए च्याम्पियन्स लिगको फाइनलमा प्रवेश गरेको छ ।

मंगलबार लिस्बनमा भएको पहिलो सेमिफाइनलमा जर्मन क्लब आरबी लाइप्जिगमाथि ३-० को जित दर्ता गर्दै पीएसजीले उपाधि भिडन्तमा स्थान पक्का गरेको हो । पीएसजीको जितमा मार्किन्हस, एन्जल डी मारिया र जुआन बर्नाटले १-१ गोल गरे ।

खेलको तेस्रो मिनेटमा नै लाइप्जिगका क्रिस्टोफर एन्कुन्कुको प्रहार डिफेन्डरलाई लाग्दै सिधै गोलरक्षक सर्जियो रिकोको हातमा पुग्यो । त्यसको तीन मिनेटपछि नै पीएसजी अग्रता लिनबाट चुक्यो । किलीयन एमबाप्पेको थ्रु पासमा नेयमारले पेनाल्टी क्षेत्र भित्रबाट पहिलो टचमा नै बललाई पोस्टको दिशा दिन खोजेपनि सफल हुन सकेनन् ।

लगत्तै पीएसजीले गोल गरेको दावी गरेपनि रेफ्रीले त्यसलाई मान्यता दिएनन् । एमबाप्पेले बललाई जाली चुमाएपनि नेयमारले गोलरक्षकको प्रहार रोक्मे क्रममा ह्यान्ड गरेका कारण गोल मान्य भएन । खेलको १३ औं मिनेटमा पीएसजीले मार्किन्हसको गोलमा अग्रता लियो । एन्जल डी मारियाले मैदानको बायाँ भागबाट झन्डै २५ यार्ड टाढाबाट गरेको फ्रिकिक प्रहारलाई मार्किन्हसले हेडरमार्फत गोल गरेका थिए ।

१६ औं मिनेटमा आन्दर हरेराको पासमा किलियन एमबाप्पेको प्रहारलाई गोलरक्षक पिटर गुलाक्सीले विफल पारे । २५ औं मिनेटमा लाइप्जिगका कप्तान युसुफ पल्सेनले खेल बराबरी गर्ने अवसर सदुपयोग गर्न सकेनन् । कोनराड लाइमरको कटब्याकमा पल्सेनको प्रहार पोस्टबाट थोरैले बाहिरियो ।

खेलको ३५ औं मिनेटमा नेयमारको फ्रिकिक पोस्टमा लाग्दा पीएसजीले अग्रता दोब्बर पार्ने अवसर गुमायो । नेयमारले झन्डै ३० यार्ड टाढाबाट गरेको प्रहारमा गोलरक्षकले ढिलो डाइभ दिएपनि पोस्टमा लाग्दै बाहिरीपछि खेल १-० कै अवस्थामा रहयो ।

खेलको ४२ औं मिनेटमा पीएसजीले डी मारियाको गोलमा अग्रता दोब्बर पार्यो । गोलरक्षक गुलाक्सीले क्लियर गर्ने क्रममा मिस पास गरेपछि आएको बललाई नेयमारले फ्लिक गरेर डी मारियातर्फ दिए । अनमार्क रहेका डी मारियाले सहजै गोल गर्दै अग्रता दोब्बर पारे । ४४ औं मिनेटमा एमबाप्पेको पासमा नेयमारले पेनाल्टी क्षेत्र भित्रबाट गोल गर्न सकेनन् ।

दोस्रो हाफको ५६ औं मिनेटमा पीएसजीले जुआन बर्नाटको गोलसँगै ३-० को अग्रता लियो । मुकिएलेले बायाँ कर्नरमा बल फुस्काएपछि डी मारियाले उक्त बलमा दिएको क्रसलाई बर्नाटले गोलमा परिणत गरे । लाइप्जिगले बल फुस्काउँदा मुकिएलेमाथि फल भएको भन्दै विरोध गरेपनि भिएआरले गोललाई मान्यता दिएको थियो ।

६० औं मिनेटमा लाइप्जिगका मार्सल साबिट्जरको पेनाल्टी क्षेत्र बाहिरको प्रहारलाई गोलरक्षक सर्जियो रिकोले सहजै बचाए । ६५ औं मिनेटमा उनकै प्रहारले पोस्टको दिशा लिन सकेन । ७० औं मिनेटमा डी मारियाको क्रसमा एमबाप्पेको हेडरमा गोलरक्षक बिट भएपनि बल पोस्टभन्दा माथिबाट बाहिरियो ।

८० औं मिनेटमा नेयमारसँग छोटो फ्रिकिक मुभ बनाएका डी मारियाको प्रहारलाई गोलरक्षक गुलाक्सीले विफल पारे । लगत्तै रिबाउन्डमा आएको प्रहार उनले दोस्रो प्रयासमा बचाए । ८१ औं मिनेटमा लाइप्जिगको लगातार दुई प्रहारलाई डिफेन्डर थियागो सिल्भा र प्रेस्नेल किम्पेम्बेले ब्लक गर्दै खेलमा फर्कने कुनै अवसर दिएनन् ।

यस जितसँगै पीएसजीले फाइनलमा स्थान पक्का गरेको छ । दोस्रो सेमिफाइनलमा बुधबार बायर्न म्युनिख र लियोन भिड्नेछन् ।