एजेन्सी – क्लबको इतिहासमा पहिलोपटक युइएफए च्याम्पियन्स लिगको फाइनलमा स्थान बनाएको पेरिस सेन्ट जर्मेन (पीएसजी) ले स्पेनिस क्लब रियल म्याड्रिडले बनाएको कीर्तिमानलाई बराबरी गरेको छ ।

पीएसजीले च्याम्पियन्स लिगका सेमिफाइनलमा आरबी लाइप्जिगविरुद्ध ३–० को जित निकाल्दै प्रतियोगिताका पछिल्ला सबै ३४ खेलमा गोल गर्दै रियलले बनाएको कीर्तिमानलाई बराबरी गरेको हो । पीएसजीले २०१६ देखि ३४ खेलमा लगतार गोल गर्दै रियलको कीर्तिमानलाई भेट्टाएको हो ।

२०१६ अप्रिलमा इंग्लिस क्लब म्यानचेस्टर सिटीसँग १–० ले पराजित भएको खेलमा मात्रै पीएसजीले गोल गर्न असफल रहेको थियो । त्यसयता, पराजित भएको खेलमा पनि पीएसजीले गोल गर्दै आएको थियो । पछिल्ला प्रतियोगितामा क्वाटरफाइनलमा नै रोकिएको पीएसजी यसपटक भने उपाधि भिडन्तमा स्थान पक्का गर्न सफल रहयो ।

स्पेनिस क्लब रियल म्याड्रिडले २०११ देखि २०१४ को बीचको ३४ खेलमा गोल गर्दै यो कीर्तिमान बनाएको थियो । सोही समयमा रियलले युरोपियन फुटबलमा प्रभुत्व जमाएको थियो । रियलले त्यसबेला पाँच वर्षको अवधिमा चारपटक च्याम्पियन्स लिग जित्न सफल भएको थियो । पछिल्लो दुई सिजन भने रियलले प्रि–क्वाटरफाइनल पार गर्न सकेको छैन ।

फाइनलमा स्थान बनाएको पीएसजीले अब उपाधिका लागि जर्मन क्लब बायर्न म्युनिख र फ्रेन्च क्लब लियोनबीचको विजेतासँग खेल्नेछ । यि दुई टोलीले आज राति फाइनल प्रवेशका लागि प्रतिस्पर्धा गर्दैछन् । फाइनलमा गोल गरे पीएसजीले च्याम्पियन्स लिगमा दुर्लभ उपलब्धि आफ्नो नाम गर्नेछ ।