एजेन्सी – यूईएफए च्याम्पियन्स लिगमा आज राति दोस्रो सेमिफाइनलमा जर्मन क्लब बायर्न म्युनिख र फ्रेन्च क्लब लियोनबीच प्रतिस्पर्धा हुँदैछ ।

खेल पोर्चुगलको लिस्वनमा नेपाली समयअनुसार राति १२ः४५ बजेपछि हुनेछ । दुबै टिमको लक्ष्य जित निकाल्दै फाइनल पुग्नु हुनेछ । विजेताले फाइनलमा फ्रेन्च क्लब पेरिस सेन्ट जर्मेन (पीएसजी) को सामना गर्नेछ । पीएसजीले जर्मन क्लब आरबी लाइप्जिगलाई ३–० ले पराजित गर्दै पहिलोपटक च्याम्पियन्स लिगको फाइनलमा स्थान सुरक्षित गरेको छ ।

उपाधिको बलियो दावेदार बायर्न लियोनमाथि सहज जित निकाल्दै फाइनल पुग्ने दाउमा रहनेछ । क्याटलान क्लब बार्सिलोनामाथि ८–२ को सानदार जित निकालेर उच्च मनोवलमा रहेको बायर्न सोही लयलाई निरन्तरता दिने योजनामा हुनेछ ।

बायर्नका लागि रोवर्ट लेवान्डोस्की नै मुख्य हतियार हुनेछन् । उनी यो सिजनको च्याम्पियन्स लिगको सर्वाधिक गोलकर्तासमेत हुन् । उनलाई थोमस मुलर, इभान पेरिसिस, सर्ज जिनाब्री, थियागो अलकान्तरा, लियोन गोरेट्ज्काले साथ दिनेछ । यस्तै बायर्नलाई अलफन्सो डाभिस, डेभिड अलवा, जेरोमी बोएटिङ, जोसुवा किम्मिच र गोलरक्षक तथा कप्तान म्यानुयल नुएरको साथ रहनेछ ।

बायर्न ११औं पटक च्याम्पियन्स लिगको फाइनलमा पुग्ने लक्ष्यमा हुनेछ । पाँच पटकको च्याम्पियन बायर्न पाँचपटक नै उपविजेता बनेको छ । बायर्न पछिल्लोपटक २०१३ मा च्याम्पियन बनेको थियो ।
बायर्न १९७४, १९७५, १९७६, २००१ र २०१३ मा च्याम्पियन बनेको थियो । १९८२, १९८७, १९९९, २०१० र २०१२ मा उपविजेता बनेको थियो । बायर्नका प्रशिक्षक हान्सी फ्लिकले हरेक खेल शुन्यबाट शुरु हुने र टोली जितको लागि केन्द्रित रहेको बताएका छन् ।

यता, यो सिजन अन्डरडगको रुपमा रहेको लियोन पनि बायर्नलाई स्तब्ध पार्दै फाइनल पुग्ने दाउमा हुनेछ । इटालियन महारथी युभेन्टस र इंग्लिस क्लब म्यानचेस्टर सिटीको चुनौती पन्छाएर सेमिफाइनल सम्मको यात्रा गरेको लियोन बायर्नलाई स्तब्ध पार्दै पहिलोपटक फाइनल पुग्ने दाँउमा हुनेछ । युभेन्टसलाई अवे गोलमा पछि पारेको लियोनले उपाधिको दावेदारको रुपमा हेरिएको सिटीमाथि ३–१ को जित निकाल्दै पहिलोपटक सेमिफाइन्लमा पुग्न सफल भएको थियो ।

लियोनका लागि मेम्फिस डिपे, मौसा डेम्वेले, म्याक्सवेल कर्नेट, फर्नान्डो मार्कल, मार्सेलो, लियो डुवोइस, हुसेन र गोलरक्षक एन्थोनी लोपेस हुनेछ । सिटीविरुद्धको खेलमा लोपेसले उच्च प्रदर्शन गरेका थिए । मौसा डेम्वेलेले सब्सिच्युट खेलाडीको रुपमा मैदान प्रवेश गर्दै दुई गोल गरेका थिए ।

यि दुई टोलीबीच हालसम्म ८ पटक प्रतिस्पर्धा भएको छ । जसमा बायर्नले चार खेल आफ्नो पक्षमा पार्दा लियोनले दुई खेल आफ्नो पक्षमा पारेको छ । दुई खेल बराबरीमा टुंगिएको छ । पछिल्लो पटक यि दुई टिमबीच २००९–१० को सिजनको सेमिफाइनलमा प्रतिस्पर्धा गरेका थिए । जसमा बायर्न समग्रमा ४–० ले विजयी भएको थियो । पछिल्लो तीनै खेलमा बायर्न विजयी छ ।