एजेन्सी – ब्राजिल तथा फ्रान्सेली क्लब पेरिस सेन्ट जर्मेन (पीएसजी) का भेट्रान डिफेन्डर तथा कप्तान थियागो सिल्भाले च्याम्पियन्स लिग फाइनलसँगै क्लबका लागि अन्तिम खेल खेलेका छन् ।

यसअघि नै सिजनको अन्त्यमा क्लब छाड्ने घोषणा गरेका सिल्भाको पीएसजीमा अन्त्य सुखद रहन सकेन । घरेलू लिग र कप उपाधि जितेको पीएसजी च्याम्पियन्स लिगको फाइनलमा बायर्नसँग १-० ले पराजित भयो । यससँगै सिल्भाले पनि पीएसजी बसाईं टुंग्याएका छन् ।

इटलीको रिपोर्ट अनुसार इंग्लिस क्लब चेल्सीको नजरमा रहेको ३५ वर्षे सिल्भालाई फियोरेन्टिनाले प्रतिसाता ७० हजार पाउन्ड पाउने गरी प्रस्ताव गरेको उल्लेख छ । सिल्भालाई फियोरेन्टिनाले दुई वर्षको सम्झौता गर्न प्रस्ताव लगेको छ ।

सिल्भा २०१२ मा इटालियन क्लब एसी मिलानबाट पीएसजी पुगेका थिए । उनी आठ वर्षपछि पुनः इटली फर्कन सक्नेछन् । सिल्भा फ्रि ट्रान्सफरमार्फत फियोरेन्टिनासँग जोडिन लागेका हुन् । चेल्सीले पनि डिफेन्डरमाथि इच्छा देखाएको थियो । तर लाम्पार्डले हाललाई एक वर्षको लागि मात्र अनुबन्धन गर्ने भनेपछि छलफल अगाडि बढ्न सकेन ।

सिल्भाले केहि दिनअघि नै खेल पीएसजीबाट बिदा लिने घोषणा गरेका थिए । ‘यो यात्रा पक्कै अर्काे क्लबमा निरन्तर चल्नेछ, तर मेरो हृदय यहाँ नै रहनेछ,’ सिल्भाले भनेका छन्, ‘अबको यात्राले कहाँ पुर्याउँछ हेर्न बाँकी छ । म अझै केहि वर्ष युरोपमा खेलेर २०२२ को कतार विश्वकपमा जान चाहन्छु ।’

चेल्सीका प्रशिक्षक फ्रान्क लाम्पार्डले आफ्नो डिफेन्समा रहेको कमजोरी सुधार्नको लागि अनुभवी डिफेन्डरको सिल्भालाई अनुबन्ध गर्ने योजना सारेका थिए । तर क्लब र खेलाडीबीच अझै सहमति हुन सकेको छैन । चेल्सीले यसै सिजन अग्रपङ्तिमा जर्मनीका टिमो वेर्नर र डच क्लब आयाक्सका प्लेमेकर हाकिम जियाचलाई अनुबन्ध गरिसकेको छ । चेल्सी डिफेन्स लाइनलाई पनि पनि बलियो बनाउने योजनामा छ ।

सिल्भाले पीएसजीबाट ३१३ खेल खेल्दै १७ गोल गरेका छन् । उनले पीएसजीबाट ७ लिग वान, ६ कप डि ला लिग र समान पाँचपटक कप डि फ्रान्स र ट्रफी डेस च्याम्पियन्स जितेका छन् ।

यो पनि : किंग्सले कोमान : पीएसजीमै हुर्किए, पीएसजीलाई हराए