एजेन्सी – अघिल्लो सिजनको इंग्लिस प्रिमियर लिग च्याम्पियन लिभरपुलले क्लब मैत्रीपुर्ण खेलमा सहज जित निकालेको छ ।

अष्ट्रियामा शनिबार राति भएको खेलमा लिभरपुलले जर्मन क्लब भीएफबी स्टुटगार्टमाथि ३–० को सहज जित हात पारेको हो । लिभरपुलको जितमा रोवर्टाे फिर्मिन्हो, नावी केइटा र रायन ब्रिभस्टरले गोल गरे । पहिलो हाफमा दुई तथा दोस्रो हाफमा एक गोल सम्भव भएको थियो ।

१५औं मिनेटमा फिर्मिन्होको गोलबाट लिभरपुलले खेलमा अग्रता बनाएको थियो । ४०औं मिनेटमा नावी केइटाले अग्रता दोब्बर पारे । दोस्रो हाफमा लिभरपुलले पुरै ११ जना खेलाडी परिवर्तन गरेको थियो । ६८औं मिनेटमा परिवर्तित रियानले गोल गर्दै लिभरपुलको जित पक्का गरे ।

यस्तै अर्काे मैत्रीपुर्ण खेलमा इंग्लिस क्लब एभर्टनले लिग वान क्लब ब्ल्याकपुलसँग ३–३ गोलको बराबरी खेलेो छ । एभर्टनले ३–० ले पछि परेको स्थिति उल्ट्याएर खेललाई बराबरीमा ल्याउन सफल भएको हो ।

सिजे ह्यामिल्टन, सुले काइकाइ र ग्रान्ट वार्डले गोल गर्दा ब्ल्याकपुलले ११ मिनेटभित्र ३–० को अग्रता बनाएको थियो । तर, ब्ल्याकपुलले त्यो अग्रता जोगाउन सकेन । २२औं मिनेटमा डोमिनिक कलभर्ट लेविनले गोल गरे । ३०औं र ७२औं मिनेटमा गिल्फी सिगर्डसनले गोल गर्दै खेललाई ३–३ गोलको बराबरीमा ल्याए ।