एजेन्सी – इंग्लिस सिजनको सुरुवातको रुपमा लिइने प्रतिष्ठित कम्युनिटी सिल्डका लागि आज राति प्रिमियर लिग च्याम्पियन लिभरपुल र एफए कप च्याम्पियन आर्सनलबीच प्रतिस्पर्धा हुँदैछ ।

प्रिमियर लिग विजेता र एफए कप विजेताले कम्युनिटी सिल्डको फाइनलमा खेल्ने परम्परा रहेको छ । वेम्बली स्टेडियममा हुने फाइनल नेपाली समयअनुसार राति ९ः१५ बजे हुनेछ । दुवै टोली सिजनको उपाधिसहित नयाँ सिजन सुरुवात गर्ने दाउमा हुनेछन् ।

लिभरपुल गत सिजन कम्युनिटी सिल्डमा म्यानचेस्टर सिटीसँग पराजित भएको थियो । लिभरपुल ३० वर्षपछि प्रिमियर लिगको च्याम्पियन बन्दा आर्सनलले एफए कपको फाइनलमा लन्डन क्लब चेल्सीलाई पराजित गर्दै कीर्तिमानी १४औं पटक एफए कपको उपाधि जितेको थियो ।

कम्युनिटी सिल्डमा लिभरपुल र आर्सनल चौथोपटक खेल्न लागेका हुन् । यसअघिका तीन भेटमा दुई खेल लिभरपुलले तथा एक खेल आर्सनलले जितेको छ । यि दुई बीचको खेल निकै रोमाञ्चक र प्रतिस्पर्धात्मक हुने अपेक्षा गरिएको छ ।

लिग च्याम्पियन लिभरपुलका लागि साडियो माने, मोहम्मद सलह, जिओर्जिनियो वाइनाल्डम, एन्ड्रु रोबर्टसन, भर्जिल भान डाइक र गोलरक्षक एलिसन बेकर आर्सनलविरुद्ध मैदान उत्रनेछ । रोबर्टाे फिर्मिनोले खेल्नेमा शंका रहँदा युवा फरवार्ड रियन ब्रेस्टरले पहिलो रोजाईमा मौका पाउन सक्नेछन् ।

यता, भर्खरै चेल्सी छाडेर फ्रि एजेन्ट बन्दै आर्सनल पुगेका ब्राजिली विंगर विलियनले आर्सनलबाट डेब्यु गर्ने सम्भावना छ । कप्तान पिएरे इमरिक औवामियाङ, ग्रानिट झाका, बुकायो साका, डेभिड लुइज र बर्न्ड लेनोले लिभरपुलविरुद्ध खेल्नेछन् ।

यि दुई टोलीो पछिल्लो २२ भेटमा लिभरपुल ७ पटक तथा आर्सनल ६ पटक विजयी भएका छन् । ९ खेल बराबरीमा सकिएको छ । पछिल्लोपटक गत जुलाईमा आर्सनलले प्रिमियर लिगमा २–१ को जित निकालेको थियो । लिभरपुल पछिल्लो चार खेलमा तथा आसर्नल पछिल्लो दुई खेलमा अपराजित छ ।

दुवै टोलीले समान १५–१५ पटक यस उपाधि जितेका छन् । पछिल्लो दुई संस्करण म्यानचेस्टर सिटी च्याम्पियन बनेको थियो ।