एजेन्सी – जर्मन फरवार्ड टिमो वेर्नरले चेल्सीको लागि डेब्यु खेल खेल्दै पहिलो गोल गरेपनि लन्डन क्लब चेल्सी प्रि–सिजनको मैत्रीपुर्ण खेलमा बराबरीमा रोकिएको छ ।

लन्डन क्लब चेल्सी प्रिमियर लिग प्रतिद्वन्द्वी ब्राइटनसँग १–१ गोलको बराबरीमा रोकिएको हो । अन्तिम समय सम्हालिन नसक्दा चेल्सी बराबरीमा रोकिन बाध्य बनेको हो । चेल्सीका लागि वेर्नरले गोल गर्दाै ब्राइटनका पास्कल ग्रसले बराबरी गोल फर्काएका थिए ।

खेलको चौथो मिनेटमा नै नयाँ खेलाडी वेर्नरले गोल गर्दै चेल्सीलाई अग्रता दिलाएका थिए । क्रसमा आएको बललाई कुलम हड्सन ओडोईले अफसाइड बिट ट्रयाप गर्दै हेडमार्फत मिलाइदिएको पासलाई वेर्नरले वान टचमा जाली चुमाएका थिए ।

वेर्नर यसै सिजनको समाप्तिसँगै जर्मन क्लब आरबी लाइप्जिगबाट ५३ मिलियन पाउन्डमा चेल्सी पुगेका थिए । यस्तै यसै सिजन डच क्लब आयाक्सबाट अनुबन्धित भएका हाकिम जियाचले पनि चेल्सीबाट ‘डेब्यु’ गरे ।

क्लबका पहिलो रोजाईका खेलाडीहरु क्रिस्टियन पुलिसिस, इमर्सन, फिकायो तोमोरी, जर्गिन्हो, मासन माउन्ट, रस बार्कली र टम्मी अब्राहम कोरोना भाइरस संक्रमणको आशंकामा सेल्फ आइसोलेसनमा रहँदा चेल्सीका प्रशिक्षक फ्रान्क लाम्पार्डलाई दवाव देखिएको थियो ।

तर, पनि खेलमा चेल्सीले नै बल पोजेसनमा पकड बनाएपनि इन्ज्युरी समयमा ब्राइटनले पेनाल्टीमार्फत बराबरी गोल फर्काउन सफल भयो । पास्कल ग्रसले पेनाल्टीमा गोल गर्दै टोलीलाई हारबाट जोगाए ।

युरोपियन क्लब फुटबलको नयाँ सिजन शुरु हुनुअघि क्लबहरु तयारी स्वरुप अभ्यास खेल खेलिरहेको छ । इंग्लिस प्रिमियर लिग १२ सेप्टेम्वरबाट शुरु हुदा चेल्सीले १४ सेप्टेम्वरमा ब्राइटनसँग नै खेल्दै प्रिमियर लिगको शुरुवात गर्नेछ ।

यस्तै अर्काे खेलमा टोटेनहमले बर्मिङघममाथि १–० को जित निकालेको छ । टोटेनहमको जितमा स्टेभेन बर्गवाइनले ८९औं मिनेटमा गरेको गोल नै निर्णायक बन्यो ।