एजेन्सी – बार्सिलोनाका अध्यक्ष जोसेप मारिया बार्टोमेउ र कप्तान लियोनल मेस्सीबीच अहिले सम्बन्धमा हार्दिकता छैन । उनीहरुबीच पछिल्लो समय छलफल भएको देखिदैन ।

अर्जेन्टिना सुपर स्टारले क्लब छाड्न चाहेको पत्रमार्फत जानकारी दिइसकेका छन् । मेस्सी नयाँ क्लब जान चाहिरहेका छन् । तर, क्लबसँग उनको अझै एक वर्ष सम्झौता रहेको छ । अध्यक्ष बार्टोमेउ सकेसम्म मेस्सीलाई फकाउने र त्यसमा असफल भएपनि सम्झौता टुंगिएपछि मात्र अन्यत्र जान सक्ने बताइएरहेका छन् ।

नयाँ सिजन सुरु हुन अब केहि दिन मात्र बाँकी छ । तर, मेस्सीको विषय टुंगो लागिरहेको छैन । ‘दुई वर्षअघि हामी र मेस्सीबीच सम्झौता भएको थियो । त्यो सम्झौता चार वर्षका लागि भएको थियो,’ बार्टोमेउले भने,’ उनको अझै एक सिजन बाँकी छ । २०२१-२२, को सिजन सुरु हुनु अघि उनले क्लब छाड्न वा फुटबल छाड्न वा अन्त जान सक्छन् ।’

मेस्सीसँगको सन्दर्भमा कुराकानी गर्दा उनले विगतमा अन्य खेलाडीको प्रसंग स्मरण गरे । ‘जाभी, इनियस्टा, पुयोलले अन्तिम पटक सम्झौता गर्दा पनि त्यस्तै थियो,’ बार्सिलोना अध्यक्षले भने, ‘यसरी सम्झौता गरेका खेलाडी अन्य क्लबमा जान्छन् भन्ने लाग्दैन । उनीहरुसँग आफ्नो स्वतन्त्रता छ । उनीहरुलाई आफ्नो भविष्यको निर्णय गर्ने सुविधा छ । वा जति बेला चाहन्छन् फुटबल छाड्न सक्छन् ।’

पछिल्लो परिस्थिति जे जस्तो भएपछि मेस्सीले बार्सिलोनाबाट खेल्नेमा बार्टोमेउले विश्वास व्यक्त गरेका छन् । उनले भने, ‘२०२१ सम्म मात्र होइन त्यो भन्दा पनि अरु धेरै बर्ष यहिबाट खेल्छन् भन्नेमा म आशावादी छु ।’

तर, अर्कोतर्फ मेस्सी भने बार्टोमेउसँग भेट्न चाहिरहेका छ्रैनन् । क्लब छाड्ने विषयमा बोर्टोमेउ पनि उनीसँग छलफल गर्ने मनस्थितिमा छैनन् । उनी मेस्सीसँग थप सम्झौताका लागि कुरा गर्न तयार रहेको अन्यथा अन्य क्लबले उनलाई किन्न ७ सय मिलियन युरो तिर्नुपर्नेमा उनी प्रष्ट छन् ।

यसका वावजुद मेस्सी आइतबार क्लबको पिसिआर परिक्षण र सोमबार प्रशिक्षणमा सामेल हुने अन्यौलमा छ ।